Túrkistan oblysynyń 33 jastaǵy turǵyny kámeletke tolmaǵan qyzdardy zorlady degen kúdikke ilindi

Túrkistan oblysynyń 33 jastaǵy turǵyny kámeletke tolmaǵan qyzdardy zorlady degen kúdikke ilinip, qamaýǵa alyndy, dep habarlaıdy Kazinform. 

Áleýmettik jeli belsendisi Ońǵar Qabdenniń jazýynsha, Otyrar aýdanynda 5 bala zorlanǵan. Onyń aldy 9 jasta bolsa, sońy 7 jastaǵy jetkinshekter. Sondaı-aq jábirlenýshiniń bireýi er bala bolǵan.

«Túrkistan oblysy Otyrar aýdany boıynsha jetken sońǵy málimet. «Zorlanǵan balalardyń sany – 5» degen beıresmı aqparat bar», - dep jazdy jeli qoldanýshysy.

Atalǵan máselege oraı resmı túrde jaýap bergen Túrkistan oblysy polıtsııa departamentiniń bastyǵy Murat Qabdenov jedel is-sharalar barysynda kúdiktiniń ustalyp, tergelip jatqanyn jetkizdi. Sondaı-aq óńirdiń bas polıtseıi istiń tergelýi jeke baqylaýyna alynǵanyn málimdedi.

«Túrkistan oblysynyń polıtseıleri 33 jastaǵy aýyl turǵyny tarapynan kámeletke tolmaǵan qyzdarǵa qatysty quqyqqa qaıshy áreketter jasaý faktisi boıynsha eki jergilikti turǵynnyń aryzyna sáıkes sotqa deıingi tergeý júrgizip jatyr. Túrkistan oblysy polıtsııa departamentiniń bastyǵy retinde, meniń tapsyrmam boıynsha arnaıy jedel-tergeý toby quryldy. QR QK 120-baby 4-bóligi «zorlaý» boıynsha qylmystyq is qozǵaldy. Barlyq mán-jaıdy anyqtaý úshin qajetti is-sharalardyń barlyǵy júrgizilip jatyr», - dep jazdy óńirdiń bas polıtseıi jelidegi paraqshasynda.

Aıta keteıik, polıtsııa tarapynan usynylǵan aqparatqa súıensek, kúdikti er adam qazir óz kinásin moıyndaǵan. Tergeý amaldary jalǵasyp jatyr. Tıisti saraptamalardyń barlyǵy taǵaıyndalǵan.