Túrkistan oblysyndaǵy joldarǵa aýyr júk kólikterinen 12,3 mlrd teńge shyǵyn keldi
TÚRKІSTAN. KAZINFORM — Túrkistan oblysynda aýyr júk kólikteriniń belgilengen salmaq normalaryn saqtamaýy joldardyń merziminen buryn tozýyna sebep bolyp otyr. Bul júk tasymalyndaǵy baqylaý tetikterin kúsheıtýdi talap etedi.
Oblystyq jolaýshylar kóligi jáne avtomobıl joldary basqarmasynyń málimetinshe, óńirde tirkelgen aýyr júk kólikteriniń sany 36 784-ke jetken.
Sońǵy eki jyl ishinde osy kólikterdiń belgilengen salmaq normalaryn saqtamaýy saldarynan oblys joldary merziminen buryn tozyp, búlingen.
Mamandardyń esebinshe, aýyr júk kólikterinen jylyna jınalatyn salyq kólemi 85,4 mln teńge bolsa, jol ınfraqurylymyna keletin ortasha jyldyq zalal 12,3 mlrd teńgege jetip otyr.
— Byltyr Arys qalasy aýmaǵyndaǵy oblystyq mańyzy bar KH-8 «Ózbekstan Respýblıkasynyń shekarasy — Shardara — Arys — Temirlan» jáne KH-92 «Arys — Montaıtas» avtomobıl joldaryna avtomattandyrylǵan ólsheý stantsııalary ornatyldy. Atalǵan júıeler arqyly anyqtalǵan quqyqbuzýshylyqtar avtomatty túrde «Jol jáne salmaq baqylaý» aqparattyq júıesi arqyly QR Bas prokýratýrasynyń Ákimshilik quqyq buzýshylyqtardyń biryńǵaı tizilimine engizilip, aıyppul esepteledi. Nátıjesinde búgingi kúnge deıin aýyr júk tasymaldaýshylar tarapynan 2 720 quqyqbuzýshylyq tirkelip, jalpy somasy 437,1 mln teńge aıyppul salynǵan, — delingen vedomstvo taratqan aqparatta.
Bıyl Saıram aýdanyndaǵy oblystyq mańyzy bar KH-3 «Kóksáıek — Aqsý — Shaıan — Myńbulaq — M-32» avtomobıl jolynyń Qaramurt jáne Aqsýkent eldi mekenderi tusynda, sondaı-aq KXSR-16 «Aqsý — Kómeshbulaq» jolynyń Áıteke bı eldi mekeni mańynda jańa avtomattandyrylǵan ólsheý stantsııalary iske qosyldy. 2025 jylǵy 1 naýryzdan bastap bul ýchaskelerde aıyppuldar ERAP júıesi arqyly avtomatty túrde esepteledi.
Sonymen qatar, 2026-2028 jyldar aralyǵynda jergilikti mańyzy bar avtomobıl joldaryna qosymsha 11 avtomattandyrylǵan ólsheý stantsııasyn ornatý josparlanyp otyr.
Budan buryn 2026 jylǵy qańtardan bastap Qazaqstanda jalpy paıdalanymdaǵy avtomobıl joldarymen samosvaldardyń júrýine qatysty erejeler qaıta qaralǵanyn jazǵan edik.