Túrkistan oblysyndaǵy jol-kólik oqıǵasy saldarynan avtobandaǵy qozǵalys toqtady
TÚRKІSTAN. KAZINFORM — «Batys Eýropa — Batys Qytaı» avtojolynyń Túrkistan oblysy aýmaǵyndaǵy bir bóliginde birneshe kóliktiń qatysýymen jol-kólik oqıǵasy boldy. Apattan keıingi qutqarý, tazalaý sharalary úshin atalǵan avtobanda kólik qozǵalysyn ýaqytsha toqtatýǵa týra kelgen.
Oqıǵa ornynan túsirilgen beınejazba áleýmettik jelilerde tarady. Kadrlardan Túrkistan oblysy Saıram aýdanyndaǵy Qarabulaq pen Mankent aýyldarynyń arasyndaǵy jolda qatty soqqy alǵan birneshe avtokólikti kórýge bolady.
Quqyq qorǵaý organdarynyń málimetinshe, jol-kólik oqıǵasy «Batys Eýropa — Batys Qytaı» avtojolynda bolǵan. Aldyn ala derekterge sáıkes, qolaısyz aýa raıy jaǵdaıynda, atap aıtqanda qoıý tuman kezinde jolda kele jatqan Chevrolet Cobalt markaly kólikteriniń biriniń júrgizýshisi sol markadaǵy taǵy eki kólikpen soqtyǵysqan.
Apat saldarynan eki adam jaraqat alyp, aýrýhanaǵa jetkizildi. Qaza tapqandar joq. Oqıǵanyń mán-jaıyn anyqtaý úshin tekserý júrgizilip jatyr. Qazirgi tańda atalǵan jol ýchaskesindegi qozǵalys qaıta qalpyna keltirildi.
Polıtsııa ókilderi júrgizilip jatqan profılaktıkalyq jumystarǵa qaramastan, keıbir júrgizýshiler jol qozǵalysynyń qarapaıym erejelerin elemeı jatqanyn aıtty.
— Polıtsııa jol-kólik oqıǵalarynyń aldyn alý jáne jol qozǵalysy erejelerin saqtaý maqsatynda turaqty túrde profılaktıkalyq is-sharalar men túsindirý jumystaryn júrgizip keledi. Alaıda qabyldanyp jatqan sharalarǵa qaramastan, jekelegen júrgizýshiler qaýipsizdik talaptaryn elemeı, bul óz kezeginde apatty jaǵdaılarǵa ákelip soǵyp jatyr, — dep habarlady Túrkistan oblystyq polıtsııa departamentinde.
Quqyq qorǵaý organdary júrgizýshilerdi taǵy da jol qozǵalysy erejelerin qatań saqtaýǵa, qaýipsiz jyldamdyqty tańdaýǵa, jol jáne aýa raıy jaǵdaılaryn eskerýge, sondaı-aq kólik tizgininde barynsha muqııat bolýǵa shaqyrdy.
Buǵan deıin sınoptıkter óńirdegi avtojoldarda kórý deńgeıiniń tómendeýi múmkin ekenin eskertken. Olardyń málimetinshe, 7 qańtar kúni Túrkistan oblysynyń ońtústiginde jáne taýly aýdandarynda da tuman kútiledi. Taýly asýlarda soltústik-shyǵys baǵyttaǵy jeldiń ekpini sekýndyna 15-20 metrge deıin jetýi múmkin.