Túrkistan oblysyndaǵy ýran óndirýshi kompanııada apat boldy – feık
TÚRKІSTAN. KAZINFORM – Sozaq aýdanyndaǵy geotehnologııalyq polıgonǵa radıoaktıvti ýran tógilgen joq. «Qazatomónerkásip-SaUran» JShS jelide tarap jatqan apat týraly aqparatty teriske shyǵardy.
Áleýmettik jelige vıdeo júktegen avtordyń aıtýynsha, Sozaq aýdanyndaǵy geotehnologııalyq polıgonǵa radıoaktıvti ýran tógilgen. Apat saldarynan aýa buzylyp, jer anaǵa úlken zardap kelgen. Vıdeodan jumysshylardyń eshqandaı qaýipsizdik erejelerin saqtamaı júrgenin kórýge bolady. Tipti, kúrekpen aryq ashyp, ýran delingen sýdyń arnasyn burǵan.
Jelide jarııalanǵan jazbaǵa pikir bildirýshiler ýran óndirýshilerdi aıyptap jatyr. Olardyń arasynda «Ýrandy zaýytqa aıdaıtyn úlken qubyrda apat bolyp, qorshaǵan ortaǵa zııanyn tıgizip otyr», «Radıatsııa», «Jumysshylarǵa qaýipti ekenin aıtpaǵan ba?» degen jazbalar bar.
Al, «Qazatomónerkásip-SaUran» JShS polıgonyndaǵy oqıǵa týraly jelide taraǵan aqparatty teriske shyǵardy.
«Bul málimdeme shyndyqqa sáıkes kelmeıtinin habarlaımyz. «Qazatomónerkásip-SaUran» JShS-tiń jumys istep turǵan kenishterinde tehnologııalyq apat tirkelgen joq. Beınerolık 2019 jyly konservatsııaǵa jabylǵan «Ońtústik Moıynqum» kenishiniń geotehnologııalyq polıgonynda kenish jumys istep turǵan kezeńde túsirilgen. Qazirgi ýaqytta kenish jumys istemeıdi», - delingen aqparatta.
Sala mamandarynyń aıtýynsha beınejazbada jańa magıstraldyq qubyrlardy paıdalanýǵa berer aldynda olardy gıdravlıkalyq synaýdy aıaqtaý protsesi kórsetilgen.
«Synaqtar hımııalyq zattarsyz jáne qaýipsiz tehnıkalyq sýdy qoldaný arqyly júrgizilgen. Gıdro synaqtar aıaqtalǵannan keıin qubyrlardaǵy tehnıkalyq sý arnaıy daıyndalǵan transheıalarǵa quıyldy, bul tehnologııalyq reglamenttiń buzylýy nemese aýytqýy bolyp sanalmaıdy. «Ońtústik Moıynqum» kenishi 2019 jyldyń mamyr aıynan bastap konservatsııada. Taratý jumystarynyń bastalýy 2025 jyldyń 2-shi toqsanyna josparlanǵan», - delinen «Qazatomónerkásip» UAK» AQ PR departamenti usynǵan aqparatta.
Aıta keteıik, budan buryn Otyrarda zııandy qaldyq jerge tógilip, kompanııa jaýapqa tartylǵan bolatyn.
