Túrkistan oblysyndaǵy sý aıdyndarynda 21 qaıǵyly oqıǵa tirkeldi

TÚRKІSTAN. KAZINFORM - Óńirdegi arnaıy shomylý oryndarynyń azdyǵy eń úlken máseleniń birine aınaldy.

Jyl basynan beri Túrkistan oblysyndaǵy sý aıdyndarynda 21 qaıǵyly oqıǵa tirkeldi. Atap aıtar bolsaq, Ózbekstan Respýblıkasynyń eki azamatynyń máıiti shekaralas kanaldar arqyly aǵyp kelgen.

Sondaı-aq, kólik quralyn ıgere almaı kanalǵa qulaǵan 5 adam sýǵa batyp ketti. Belgisiz jaǵdaılarda sý qoımadan, jasandy kólshikten jáne kanaldan 3 adamnyń denesi tabyldy.

Ata-anasynyń qaraýynsyz qalǵan 6 bala shuńqyrǵa, kanal-aryqqa qulap qaıtys boldy. 

- Ótken jyly túrli jaǵdaılarda 60 adam sýǵa batyp qaıtys boldy. Onyń ishinde 31 bala bar. Tótenshe jaǵdaılardy esepke alý talaptaryna sáıkes shomylý barysynda qaza tapqan 16 adam, onyń ishinde 5 bala esepke alyndy, - delingen Túrkistan oblysy TJD baspasóz qyzmeti usynǵan aqparatta. 

Jalpy, óńirdegi arnaıy shomylý oryndarynyń azdyǵy eń úlken máselelerdiń biri aınalyp otyr. Ótken jyly atqarylǵan jumystardyń nátıjesinde qosymsha 14 shomylatyn arnaıy jaǵajaı iske qosylǵan. Degenmen, bul 2 mln-nan astam halqy bar oblys úshin azdyq eteri anyq. Sondyqtan bıyl shomylýǵa arnalǵan ashyq jaǵajaılardyń sanyn 50-ge jetkizý josparlanyp otyr. 

Sondaı-aq, departament qyzmetkerleri táýlik boıy sý aıdyndarynda profılaktıkalyq reıd jumystaryn júrgizip keledi. Jyl basynan beri sýdaǵy qaýipsizdik qaǵıdalaryn buzǵan 10 adamǵa 137 620 teńge kóleminde ákimshilik shara qoldanylǵan.

Aıta keteıik, budan buryn Pavlodarda Ertis ózenine batyp ketken er adamdy izdeý jumystary qaıta jandanǵanyn jazǵan bolatynbyz.