Túrkistan oblysyndaǵy shekara mańynda 42 vagon kartopty úsik uryp ketti
TÚRKІSTAN. KAZINFORM – Shekarada qalyp qoıǵan ónim sýyqqa shydamaǵan.
Áleýmettik jelide taraǵan aqparatqa súıensek, Pavlodardan Ózbekstanǵa jóneltilgen kartopty jergilikti aýyl sharýashylyǵy qyzmetkerleri «qujattaryn tekseremiz» dep Saryaǵashta toqtatqan. Sodan shekara mańynda turyp qalǵan ónim aıazdan úsip ketken. Al, kún jylynǵanda sýy aǵyp, jaramsyz kúıge túsken.
«Ár vagonda 68 tonna kartop baryn, qazaq kásipkerleri 800 mln. teńge shyǵynǵa batqanyn eskersek sheneýnikterdiń tirligine kádimgideı qarnyń ashady?!» - dep jazdy facebook paraqshasynda Bahtııar Hamıt esimdi jeli qoldanýshysy.
Atalǵan aqparatqa aýyl sharýashylyǵy mınıstrligi resmı túrde jaýap berdi.
«Júk jóneltýshiler jalpy kólemi 2,7 myń tonna kartop partııasyna fıtosanıtarııalyq sertıfıkattardy úshinshi elderge kóliktiń barlyq túrlerimen áketýge tyıym salǵanǵa deıin alǵanyn habarlaımyz. Alaıda, «Saryaǵash» stantsııasyndaǵy shekaradan ótý kezinde eksporttyq sharttarda kórsetilgen kartoptyń quny men naqty naryqtyq qunynyń aıtarlyqtaı tómendeýine baılanysty júk jóneltýshilerge suraqtar týyndady. Qujattarǵa sáıkes eksportqa satylym, kartoptyń kılogrammyna 40-50 tengeden belgilengen. Osy sebepti vagondar barlyq jaǵdaılar anyqtalǵanǵa deıin ustaldy» - delingen aqparatta.
Sondaı-aq, mınıstrlik qujattamany teksergennen keıin 42 vagon kartop Ózbekstan Respýblıkasynyń aýmaǵyndaǵy mejeli jerge jiberilgenin málimdedi.
«Tekserý kezinde kásipkerler taýardyń búliný qaýpi tóngen jaǵdaıda kartopty ishki naryqqa básekelestik baǵamen satýǵa múmkindigi boldy. Aıta keteıik, barlyq 10 júk jóneltýshi kartoptyń jaı-kúıine qatysty memlekettik organdarǵa shaǵym túsirmegen. Týyndaǵan jaǵdaıdy retteý úshin vedomstvoaralyq komıssııanyń sheshimine sáıkes 2025 jylǵy 18 qańtardan bastap Eýrazııalyq ekonomıkalyq odaq elderine áketýdi qospaǵanda, Qazaqstan Respýblıkasynyń aýmaǵynan kóliktiń barlyq túrlerimen kartopty áketýge 6 aı merzimge tyıym salynǵanyn eske salamyz» - delingen mınıstrlik usynǵan aqparatta.
Aıta keteıik, 28 qańtardan bastap Qazaqstan aýmaǵynan úshinshi elderge kartop shyǵarýǵa tyıym salyndy.