Túrkistan oblysyndaǵy Shardara sý qoımasy 93, Bógen sý qoımasy 97 paıyz toldy
TÚRKІSTAN. KAZINFORM - Oblys aýmaǵynda sý tasqynynyń aldyn alý baǵytynda turaqty túrde monıtorıng jumystary júrgizilip jatyr.
Túrkistan oblysy boıynsha Tótenshe jaǵdaılar departamentiniń málimetine súıensek, qazirgi tańda óńirdegi jaǵdaı turaqty. Ózenderdegi sý deńgeıi de qalypty.
«Jalpy óńirdegi sý qoımalardyń tolýy – 69 paıyz bolyp otyr. Búgingi kúni Shardara 93, Bógen 97,6, Qosqorǵan 97,3, Maıdantal 100, Yrmaq ózen 91,98, Arystandy 91, Torlan 99 paıyz toldy. Syrdarııa ózenindegi jaǵdaı da qalypty. Ózbekstan aýmaǵynan sekýndyna 600 tekshe metrge jýyq sý kelip jatyr. Ózen boıyndaǵy eldi mekenderge qaýip tónip turǵan joq», - delingen TJD baspasóz qyzmeti usynǵan aqparatta.
Oblys aýmaǵynda sý tasqynynyń aldyn alý baǵytynda turaqty túrde monıtorıng jumystary júrgizilip jatyr. Azamattyq qorǵaý qyzmetteriniń kúsh pen quraldary daıyndyqqa keltirilgen.
«Myńnan astam jeke quram, 300 jýyq tehnıka daıyn. Qazirgi tańda jaýyn-shashyn joq. Taýdaǵy qar qory normadan tómendedi», - delingen vedomstva aqparatynda.
Jalpy, óńirdegi 915 shaqyrym bolatyn kanaldar men aryqtar, respýblıkalyq jáne jergilikti mańyzy bar joldardyń astyndaǵy kópirler mehanıkalyq tazartý jumystarynan ótken. 276 metr qorǵanys bógetteri salynyp, 509 metri nyǵaıtylǵan.
Aıta keteıik, Túrkistan oblysynda zańsyz tasymaldan 47 tonna dızel otyny tárkilengen bolatyn.
