Túrkistan oblysyndaǵy «Samuryq-Qazyna» AQ enshiles kompanııalarynda 113 stýdent oqıdy
TÚRKІSTAN. KAZINFORM — Túrkistan qalasyndaǵy «Farab» ámbebap-ǵylymı kitaphanasynda «Kásiporyn men kolledj – sapaly maman kepili» atty is-shara ótti.
Mańyzdy jıynǵa Túrkistan oblysynyń ákimi Nuralhan Kósherov, «Samuryq-Qazyna» AQ-nyń Korporatıvtik basqarý, áleýmettik-eńbek qatynastary jáne eńbekti qorǵaý jónindegi basqarýshy dırektory Ǵıbrat Aýǵanov, depýtattar, jaýapty sala basshylary, tehnıkalyq jáne kásiptik bilim berý uıymdarynyń basshylary men stýdentteri qatysty. Basqosýda stýdentterdi óndiristik tájirıbeden ótkizý jáne ári qaraı jumysqa ornalastyrý baǵytynda naqty qadamdar jasaldy.
Túrkistan oblysynyń ákimi Nuralhan Kósherov bul yntymaqtastyq kásibı kadr daıarlaý isin jańa deńgeıge kóteretinine senim bildirdi.
– Bul kezdesý – óńirimizdegi kásibı bilim berý júıesin jańa sapaǵa baǵyttaıtyn mańyzdy qadam. Prezıdentimizdiń 2025 jyldy «Jumysshy mamandyqtar jyly» dep jarııalanýyna baılanysty oblysta júıeli sharalar atqarylyp jatyr. Kolledjder men óndiris oryndarynyń arasyndaǵy tikeleı baılanys ornatylyp, óńir bilikti jumysshy kúshine, al kásiporyn qajetti kadrǵa qol jetkizip otyr. Memleket basshysy Qasym-Jomart Toqaev óziniń Joldaýynda «Eńbek adamy – elimizdiń tiregi. Bizge naqty kásibı maman qajet. Jastar bir mamandyqtyń qyr-syryn tereń meńgerýge umtylýy tıis» dep atap ótti. Osy maqsatta bıyl oblystaǵy tehnıkalyq jáne kásiptik bilim berý uıymdaryna 15 500 memlekettik tapsyrys bólindi. Onyń 9 500-i jumysshy mamandyqtarǵa baǵyttalyp otyr. Sol sebepti, óńirimizdiń 50 kolledjdi zamanaýı óndiris talaptaryna beıimdeı otyryp, dýaldy oqytý júıesin keń kólemde engizip jatyrmyz. Sonyń jarqyn mysaly retinde Túrkistan ındýstrııalyq aımaǵynda ornalasqan «BNK group» jáne «Jasyl-Sýyq» kompanııalaryn atap ótkim keledi. Bul kásiporyndar kolledjdermen tyǵyz seriktestik ornatyp, elektrmonter, dánekerleýshi, elektrık, tehnık-operator sııaqty suranysqa ıe mamandyqtar boıynsha stýdentterdi jumysqa qabyldap jatyr. Osy oraıda, «Samuryq-Qazyna» qorynyń quramdas kompanııalary tarapynan stýdentterdi óndiristik tájirıbeden ótkizýge jáne ári qaraı jumysqa ornalastyrýǵa baǵyttalǵan qadamdaryn joǵary baǵalaımyz. Sizdermen birlesken jumystyń nátıjesinde oblys aımaǵynda kásibı kadr daıarlaý isin jańa deńgeıge kóteremiz dep senemin. Bul – jastardyń básekege qabiletti bolýyna jáne olardyń turaqty jumyspen qamtylýyna baǵyttalǵan qadam, – degen Nuralhan Oralbaıuly kolledjder men kásiporyndar arasyndaǵy baılanysty odan ári kúsheıtýge ákimdik tarapynan tolyq qoldaý bolatynyn aıtty.
Túrkistan oblysynda «Jumysshy mamandyqtar jyly» aıasynda jańa 6 mamandyq ashyldy. Bul – óndiristik sektordyń, jumys berýshilerdiń naqty suranysynan týyndaǵan sheshim.
«Samuryq-Qazyna» AQ-nyń Korporatıvtik basqarý, áleýmettik-eńbek qatynastary jáne eńbekti qorǵaý jónindegi basqarýshy dırektory Ǵıbrat Aýǵanov jas mamandardyń jumysqa ornalasýyna birlesip qoldaý berýge daıyn ekenin aıtty.
– Prezıdent jarııalaǵan «Jumysshy mamandyqtary jyly» aıasynda kıeli óńirde ákimdikpen birlesip kásibı bilim berýdi damytý jáne jastardy qoldaý boıynsha jobalardy júzege asyryp jatyrmyz. Qordyń basqarma tóraǵasy Nurlan Jaqypov «Jumysshy mamandyqtar jylyna» arnalǵan is-sharalar josparyn bekitti. Oǵan sáıkes, jas mamandardyń áleýetin damytý, kásiporyndarǵa teorııa men tájirıbeni biriktiretin dýaldy oqytý, jumysshy mamandyqtyń biliktiligin arttyrý syndy sharalar atqarylyp jatyr. Jospar boıynsha Ǵylym jáne joǵary bilim mınıstrligimen birge dýaldy oqytý baǵdarlamalaryn iske asyrý boıynsha Jol kartasy bekitilip, jyl basynan beri 3 myńnan astam stýdent Qordyń jetekshi kásiporyndaryna tájirıbeden ótti. Qazir kolledjder men ýnıversıtetter Qor kompanııalarynyń suranysyna sáıkes mamandar daıyndaıdy. Biz óz kezegimizde olardyń tájirıbeden ótýine kómektesemiz. Osyǵan oraı, Túrkistan oblysyndaǵy enshiles kompanııalarda 113 stýdent dýaldy oqytýdan ótedi. Búgingi memorandým sózden iske kóshýdiń aıqyn dáleli, – dedi Ǵıbrat Aýǵanov.
Saltanatty is-sharada Túrkistan oblysy ákimdigi men «Samuryq-Qazyna» AQ yntymaqtastyq týraly memorandýmǵa qol qoıdy. Memorandým aıasynda stýdentterdi óndiristik tájirıbeden ótkizý jáne jumysqa ornalastyrý kózdelgen.
Odan bólek, jıyn barysynda dýaldy oqytý boıynsha «SP Býdenovskoe» kásiporyny, Kentaý kópsalaly kolledji jáne stýdent arasynda úshjaqty kelisimshartqa qol qoıyldy. Sonymen qatar «Qazaqtelekom» AQ men «Woosong» IT ýnıversıteti arasynda memorandým jasaldy.
Іs-shara sońynda «Samuryq-Qazyna» AQ «Tálimger» jobasy aıasynda 2 bitirýshi túlektiń iri kásiporyndarda jumysqa ornalasýyna qoldaý kórsetip, eńbek kitapshasyn tapsyrdy.
Osy kúni is-sharaǵa qatysýshylarǵa tehnıkalyq jáne kásiptik bilim berý uıymdaryna ekskýrsııa uıymdastyrylyp, Túrkistan qalasyndaǵy «Kópsalaly ındýstrıaldy-tehnıkalyq» kolledji men «Túrkistan joǵary Bolashaq» kolledjiniń bazasy tanystyryldy.
Aıta keteıik, Túrkistan oblysynan 2500-ge jýyq azamat kúzgi áskerge attanady.