Túrkistan oblysyndaǵy órtten zardap shekken balanyń jaǵdaıy aýyr

ASTANA. KAZINFORM — Densaýlyq saqtaý birinshi vıtse-mınıstri Tımýr Sultanǵazıev Túrkistan oblysynda úıdiń órtinen zardap shekken úsh adamnyń jaǵdaıy jóninde aıtyp berdi.

Onyń sózine qaraǵanda, eki eresek adamnyń jaǵdaıy turaqty.

— Zardap shekkenderdiń barlyǵy Shymkentke jetkizilip, olarǵa qajet kómek jasalyp jatyr. Balanyń jaǵdaıy óte aýyr. Almatydan mamandar tartylyp, turaqty túrde keńes berip jatyr. Olar em-domdy rettep, olardyń jaǵdaıyn baǵalady. Densaýlyq saqtaý mınıstrligi bul máseleni turaqty baqylaýda ustap tur, — dedi T. Sultanǵazıev Senatta tilshiler suraǵyna jaýap bere otyryp.

Eske salsaq, 18 qarashada tańerteń Jetisaı aýdanynyń Alǵabas aýylynda eki qabatty jeke turǵyn úı órtenip, 12 adam mert boldy. 

Prezıdent Qasym-Jomart Toqaev Túrkistan oblysy Jetisaı aýdanyndaǵy jeke úıde bolǵan órttiń saldarynan kóptegen adamnyń qaza tabýyna baılanysty kóńil aıtty. 
Úkimet pen Túrkistan oblysynyń ákimine zardap shekken azamattardyń týǵan-týystaryna barlyq qajetti kómek kórsetip, qaıǵyly oqıǵany jan-jaqty tekserýdi tapsyrdy.

Órtten keıin medıtsınalyq mekemelerge úsh adam — eki eresek jáne bir bala jetkizildi. Vedomstvo aqparatyna sáıkes, qazir barlyǵy reanımatsııa bóliminde jatyr, jaǵdaılary aýyr, biraq turaqty.