Túrkistan oblysyndaǵy órt: Qanat Bozymbaev Úkimettik komıssııa múshelerine tapsyrma berdi
ASTANA.KAZINFORM - Vıtse-premer Qanat Bozymbaev Túrkistan oblysynyń Jetisaı aýdany Alǵabas aýylyndaǵy jeke úıde bolǵan órttiń sebebin tergep-tekserý boıynsha qurylǵan Úkimettik komıssııa múshelerine birqatar tapsyrma berdi. Bul týraly Úkimettiń baspasóz qyzmeti habarlady.
Oqıǵa ornyna qabyldanyp jatqan jedel sharalar týraly Tótenshe jaǵdaılar mınıstri Shyńǵys Árinov, Eńbek jáne halyqty áleýmettik qorǵaý birinshi vıtse-mınıstri Asqarbek Ertaev, Densaýlyq saqtaý birinshi vıtse-mınıstri Tımýr Sultanǵazıev, Іshki ister vıtse-mınıstri Sanjar Ádilov, Energetıka vıtse-mınıstri Qaıyrhan Tutqyshbaev, Oqý-aǵartý vıtse-mınıstri Asylbek Ahmetjanov jáne «QazaqGaz Aimaq» AQ bas dırektory Baýyrjan Asqarov, Túrkistan oblysynyń ákimi Nuralhan Kósherov baıandama jasady.
Qaza tapqan azamattardyń otbasylaryna barlyq qajetti kómek kórsetilip jatyr. Aýrýhanaǵa túsken úsh adamnyń jaǵdaıy aýyr, olar jansaqtaý bóliminde jatyr. Qutqarýshylar kelgen sátte zardap shekkenderdiń biri, 1986 jyly týǵan azamat úıden óz kúshimen shyǵyp úlgergen. Onyń jaǵdaıy aýyr dep baǵalanýda, denesiniń 12%-yn kúıik shalǵan. Taǵy eki zardap shegýshi – 1991 jáne 2018 jyly týǵan azamattar da, denesiniń 30% jáne 11% kúıigimen shuǵyl túrde aýrýhanaǵa jetkizildi, qazir olar ÓJJ apparatyna qosylǵan.
Jedel medıtsınalyq kómek kórsetý úshin Shymkentten sanıtarlyq avıatsııa brıgadasy ushyp shyqty. Órttiń sebebi anyqtalyp jatyr.
QK 292-babynyń 3-bóligi boıynsha sotqa deıingi tergeý júrgizilip jatyr. Oqıǵa ornynda Órtke qarsy qyzmet komıteti men Tergeý basqarmasynyń basshylyq quramynan qurylǵan jedel top jumys istep jatyr. Vıtse-premer ákimdikke jáne Eńbek jáne halyqty áleýmettik qorǵaý mınıstrligine qaza tapqandardyń otbasylaryna qajetti materıaldyq kómekti tolyq kólemde kórsetýdi tapsyrdy.
Densaýlyq saqtaý mınıstrligine zardap shekkenderdiń jaǵdaıyn turaqty baqylaýda ustaý, qajet bolǵan jaǵdaıda sanıtarlyq avıatsııany paıdalana otyryp, olardy Astana qalasyna jetkizýdi uıymdastyrý júkteldi. Іshki ister mınıstrligine adamdardyń qaza bolýyna qatysty sotqa deıingi tergeýdiń barysyn erekshe baqylaýǵa alý tapsyryldy.
Tótenshe jaǵdaılar mınıstrligine óńirlerdiń ákimdikterimen birlesip, turǵyn úıler, ásirese HÁOT jatatyn otbasylardyń úılerine, jataqhanalar men hostelderge reıd júrgizý týraly tapsyrma berildi. Reıd barysynda pesh júıeleriniń jaǵdaıy tekserilip, aqaýlar anyqtalsa, olardy jedel túrde joıý qajet.
Túrkistan oblysynda órtten qaza bolǵan 12 adamdy jerleýge kómek beriletinin jazǵan bolatynbyz.