Túrkistan oblysyndaǵy órt: Aman qalǵandardyń jaǵdaıy belgili boldy

TÚRKІSTAN. KAZINFORM — Túrkistan oblysy Jetisaı aýdany Alǵabas aýylyndaǵy órtten keıin medıtsınalyq mekemelerge úsh adam — eki eresek jáne bir bala jetkizildi, dep habarlaıdy oblystyq densaýlyq saqtaý basqarmasynyń baspasóz qyzmeti.

Vedomstvo aqparatyna sáıkes, qazir barlyǵy reanımatsııa bóliminde jatyr, jaǵdaılary aýyr, biraq turaqty.

— 18 qarashada Jetisaı aýdanynda bolǵan órtke baılanysty óńirdiń medıtsınalyq qyzmeti zardap shekkenderge jedel túrde kómek kórsetýdi bastady. Medıtsınalyq mekemelerge úsh adam — eki eresek jáne bir bala jetkizildi. Barlyǵy reanımatsııa bóliminde jatyr, jaǵdaılary aýyr, biraq turaqty. Naýqastarǵa ıntensıvti terapııanyń tolyq kesheni júrgizilýde, olardyń jaǵdaıy salalyq mamandardyń tolyq baqylaýynda, — delingen habarlamada.

Sonymen qatar basqarma jedel medıtsına jelisi boıynsha kúsheıtilgen jumys tártibi engizilgenin málim etti.

— Oblystyq densaýlyq saqtaý mekemelerinen qosymsha mamandar tartylyp, qajetti dári-dármekpen jáne psıhologııalyq qoldaýmen qamtamasyz etildi. Jaǵdaı Túrkistan oblysynyń densaýlyq saqtaý basqarmasynyń baqylaýynda, — dep atap ótti oblystyq densaýlyq saqtaý basqarmasynan.

Eske salsaq, Túrkistan oblysy Jetisaı aýdanynyń Alǵabas aýylynda eki qabatty jeke turǵyn úı órtenip, 12 adam mert boldy. Onyń 9-y bala.

Prezıdent Qasym-Jomart Toqaev órt saldarynan kóptegen adamnyń qaza tabýyna baılanysty kóńil aıtyp, Úkimet pen Túrkistan oblysynyń ákimine zardap shekken azamattardyń týǵan-týystaryna barlyq qajetti kómek kórsetip, qaıǵyly oqıǵany jan-jaqty tekserýdi tapsyrdy.

QR Bala quqyqtary jónindegi ýákil Dınara Zákıeva órt shyqqan úıde eki otbasy, ata-analary men balalary turǵanyn habarlady.

Sondaı-aq Prezıdenttiń tapsyrmasy boıynsha Túrkistan oblysyndaǵy órtke baılanysty Úkimettik komıssııa qurylǵany anyqtaldy.

Budan bólek «Órt qaýipsizdigi talaptaryn buzý» babymen qylmystyq is qozǵaldy.