Túrkistan oblysyndaǵy órt: aman qalǵan naýqastar Astanaǵa jetkizilýi múmkin

ASTANA. KAZINFORM — QR Densaýlyq saqtaý birinshi vıtse-mınıstri Tımýr Sultanǵazıev Túrkistan oblysy Alǵabas aýylyndaǵy órtten keıin medıtsınalyq mekemelerge jetkizilgen úsh adam keıinnen em-domyn Shymkentte nemese Astanada jalǵastyratynyn aıtty.

- Aýrýhanaǵa jetkizilgenderdiń jaǵdaılary aýyr, biraq turaqty. Qyz bala men áıel jasandy tynys alý apparatynda jatyr. Al er adam óz kúshimen tynys alýǵa qaýqarly. Olardyń barlyǵy shok alǵan jáne 11-12 paıyzdan 30 paıyzǵa deıin ártúrli dárejede kúıik shalǵan», - dedi T. Sultanǵazıev Parlament Májilisinde tilshiler suraǵyna jaýap bere otyryp.

Onyń aıtýynsha, zardap shekkenderge barlyq qajetti medıtsınalyq kómek kórsetilip, aýdandyq aýrýhananyń jansaqtaý bólimine jatqyzyldy.

- Sanıtarlyq avıatsııamen bes maman jiberildi. Olar qazir sol jerde em-domǵa kómektesip jatyr. Barlyq dári-dármek jetkilikti. Endigi basty maqsat – olardyń jaǵdaıyn turaqtandyrý, - dedi vıtse-mınıstr.

Onyń sózine qaraǵanda, órtten zardap shekken úsh naýqasty Shymkentke nemese Astanadaǵy respýblıkalyq klınıkaǵa jetkizý qarastyrylyp jatyr.

Keshe tańerteń Jetisaı aýdanynyń Alǵabas aýylynda eki qabatty jeke turǵyn úı órtenip, 12 adam mert boldy.

Prezıdent Qasym-Jomart Toqaev Túrkistan oblysy Jetisaı aýdanyndaǵy jeke úıde bolǵan órttiń saldarynan kóptegen adamnyń qaza tabýyna baılanysty kóńil aıtty.

Úkimet pen Túrkistan oblysynyń ákimine zardap shekken azamattardyń týǵan-týystaryna barlyq qajetti kómek kórsetip, qaıǵyly oqıǵany jan-jaqty tekserýdi tapsyrdy.

Órtten keıin medıtsınalyq mekemelerge úsh adam — eki eresek jáne bir bala jetkizildi. Vedomstvo aqparatyna sáıkes, qazir barlyǵy reanımatsııa bóliminde jatyr, jaǵdaılary aýyr, biraq turaqty.