Túrkistan oblysyndaǵy mektepter Ilon Masktyń ınternet jelisine qosyla bastady
TÚRKІSTAN. KAZINFORM - Óńirdegi shalǵaı aýyldarda ornalasqan 330 mektep Starlink jelisimen jumys isteıdi.
Túrkistan oblysyndaǵy 911 memlekettik mekteptiń barlyǵy ınternet jelisimen qamtylǵan. Onyń ishinde 581 mektepke talshyqty-optıkalyq baılanys jelisi arqyly jyldamdyǵy 20-80 Mbıt/s aralyǵyndaǵy ınternet jelisi ornatylǵan. Al, taǵy 33 mektep jýyrda optıkamen qamtylady.
Budan bólek, 330 mektep shalǵaı jáne taýly aýmaqtarda ornalasýyna baılanysty, tehnıkalyq múmkindigine qaraı jyldamdyǵy 512 Kb/s - 20 Mbıt/s quraıtyn tómen jyldamdyqty ınternet jelisimen qamtylǵan. Búginde atalǵan bilim uıalarynyń 200-den astamy Ilon Masktyń Starlink spýtnıktik ınternetine qosyldy. Qalǵan aýyldar sáýir aıynyń sońynda jańa jelimen jumys jasaýdy bastaıdy.
«Qazirgi tańda oblys aýmaǵynda 203 mektepte Starlink spýtnıktik ınternet jelisiniń qurylǵylary ornatyldy. Bul óte úlken kórsetkish. Qalǵan mektepterde ınternet jelisiniń qurylǵylaryn ornatýdy bıyl sáýir aıynyń sońyna deıin aıaqtaý josparlanyp otyr. Sonda Túrkistan oblysynda mektepterdegi ınternet máselesi tolyq sheshimin tabady», – dedi Túrkistan oblysy ákimi apparatynyń basshysy Erkeǵalı Álimqulov.
Qazyǵurt jáne Tólebı aýdandaryndaǵy bilim uıalaryn sapaly ınternet jelisimen qamtý jumystarymen tanysqan Erkeǵalı Álimqulov qala men aýyl turǵyndarynyń sapaly bilim alýyna birdeı múmkindik jasalatynyn aıtty.
