Túrkistan oblysyndaǵy kolledjderde suranysy tómen mamandyqtar qysqartylmaq
TÚRKІSTAN. KAZINFORM – Búginde oblysta 50 kolledj bar. Onyń 28-i memlekettik bolsa, 22-si – jekemenshik.
Oblystyq bilim basqarmasy basshysynyń mindetin atqarýshy Ǵalymjan Orynovtyń aıtýynsha, óńirdegi kolledjder aýyl sharýashylyǵy, qurylys, qyzmet kórsetý, týrızm, tehnıka jáne tehnologııa, medıtsına, óner jáne gýmanıtarlyq ǵylymdar, bilim salalary boıynsha mamandar daıarlaıdy.
Qazirgi tańda 84 mamandyq boıynsha 46 747 stýdent bilim alyp jatyr. Onyń 79 paıyzy memlekettik tapsyrys negizinde oqıdy.
2024-2025 oqý jylynda oblys kolledjderin 12 619 stýdent támamdaǵan. Túlekterdiń 81 paıyzy jumyspen qamtylyp, josparlanǵan kórsetkish tolyq oryndalǵan. Bul 2024 jylmen salystyrǵanda 5 paıyzǵa joǵary.
– Taldaý nátıjesinde tehnıkalyq, óndiristik jáne aýyl sharýashylyǵy baǵytyndaǵy mamandyqtar boıynsha jumyspen qamtý deńgeıi 90-100 paıyz aralyǵynda ekeni anyqtaldy. Al qyzmet kórsetý, shyǵarmashylyq jáne áleýmettik baǵyttaǵy mamandyqtarda kórsetkish ortasha deńgeıde qalyp otyr. Keıbir medıtsına, qaýipsizdik jáne ákimshilik mamandyqtary boıynsha eńbek naryǵyndaǵy suranys tómen. Osyǵan baılanysty 2026 jylǵa memlekettik bilim berý tapsyrysyn usynýda suranysy tómen mamandyqtardy qysqartyp, ınvestıtsııalyq jobalarmen jáne óńirdiń naqty kadr qajettiligimen tikeleı baılanystyrý josparlanyp otyr, – dedi ol.
Vedomstvonyń málimetinshe, 2025-2026 oqý jylyna oblysqa 15 500 memlekettik grant bólingen. Onyń 57 paıyzy jumysshy mamandyqtaryna baǵyttalǵan. 692 kásiporynmen jasalǵan kelisimder aıasynda 36 kolledjde 11 223 stýdent dýaldy formatta bilim alyp júr.
Óńirdegi 12 kolledj sheteldik oqý oryndarymen 20 halyqaralyq memorandýmǵa qol qoıyp, qos dıplom berý, akademııalyq utqyrlyq jáne pedagogterdiń halyqaralyq taǵylymdamasyn iske asyryp otyr. Ótken jyly 3 kolledj halyqaralyq akredıtatsııadan ótken.
Budan buryn qazaqstandyq kolledjde jasandy ıntellekt zerthanasy ashylatynyn jazǵan edik.
