Túrkistan oblysyndaǵy qoqys polıgondarynyń 70 paıyzy sanıtarlyq-ekologııalyq talaptarǵa saı emes

TÚRKІSTAN. KAZINFORM – Kópshiligi qajetti ınfraqurylymmen qamtamasyz etilmegen.

Túrkistan oblysy aýmaǵynda turmystyq qaldyqtardy tógetin 128 polıgon bar. Onyń 38-i aýdandyq deńgeıde, 41-i aýyldyq okrýgterde ornalasqan. Qalǵan 49 polıgon senimgerlik basqarýǵa berilgen.

Júrgizilgen taldaý nátıjesinde polıgondardyń 70 paıyzdan astamy sanıtarlyq-ekologııalyq talaptarǵa saı kelmeıtini anyqtalǵan. Olardyń basym bóligi elektr energııasymen, sýmen, arnaıy qoqys kómýge arnalǵan shuńqyrlarmen, qorshaýlarmen jáne ózge de qajetti ınfraqurylymmen qamtamasyz etilmegen.

Túrkistan oblysy ákimdiginiń málimetinshe, qoldanystaǵy qatty turmystyq qaldyqtar polıgondaryn sanıtarlyq-ekologııalyq talaptarǵa sáıkestendirý maqsatynda «Túrkistan oblysy aýmaǵyndaǵy qatty turmystyq qaldyqtardy tógetin polıgon oryndaryn ońtaılandyrý jáne talaptarǵa sáıkestendirý jospary» bekitilgen. Qazirgi tańda osy jospar aıasynda polıgondardy kezeń-kezeńimen retke keltirý jumystary júrgizilip jatyr. 

– 2020–2023 jyldary aýdandyq bıýdjet esebinen 16 joba ázirlenip, memlekettik saraptamanyń oń qorytyndysy alyndy. Byltyr oblystyq bıýdjetten qarjy bólinip, Sozaq aýdanyndaǵy Qarataý, Qaraqur jáne Jýantóbe aýyldyq okrýgterinde qatty turmystyq qaldyqtarǵa arnalǵan polıgondardyń qurylysy júrgizildi. Sonymen qatar, polıgondardy ońtaılandyrý maqsatynda Túlkibas aýdanynda 8, al Otyrar aýdanynda 16 polıgon jabylyp, olardyń jerleri memlekettik jer qoryna ótkizildi, – delingen Túrkistan oblysy ákiminiń baspasóz qyzmeti taratqan habarlamada.

Aıta keteıik, budan buryn Túrkistan oblysynda qoqys jınaýdan jarys ótkenin jazǵan bolatynbyz.