Túrkistan oblysyndaǵy qoǵamdyq tamaqtaný oryndarynda ýlaný jaǵdaılary jıilegen

  TÚRKІSTAN. KAZINFORM — Óńirdegi qoǵamdyq tamaqtaný oryndarynyń kópshiligi ruqsatsyz qyzmet etken. 

Sońǵy jyldary Túrkistan oblysynda qoǵamdyq tamaqtaný oryndarynda taǵamnan jappaı ýlaný jaǵdaılary jıilegen. Oblystyq sanıtarııalyq-epıdemıologııalyq baqylaý departamentiniń málimetinshe, sońǵy úsh jylda bes jappaı ýlaný deregi tirkelip, 200-den astam adam zardap shekken. Bul jaıttar Arys, Kentaý, Keles, Túrkistan jáne Saıram aýdandarynda bolǵan.

Departamenttiń málimdeýinshe, óńirdegi 3883 tamaqtaný ornynyń 77 paıyzy qyzmetin ruqsat qujattarynsyz, ıaǵnı sanıtarııalyq-epıdemıologııalyq sáıkestigi týraly qorytyndysyz jáne qyzmet bastalǵany týraly resmı habarlama bermesten iske qosqan.

— Bul, oblys aýmaǵyndaǵy qoǵamdyq tamaqtaný oryndarynda sanıtarııalyq-epıdemıologııalyq talaptardyń tolyqqandy saqtalmaıtyndyǵyn aıqyndaıdy. Buǵan dálel, naýryz aıynda Túrkistan qalasynda bolǵan bir oqıǵada 68 adam taǵamnan ýlanǵan. Olar pıtstsa, sýshı jáne taýyq eti ónimderin tapsyryspen úıge aldyrtqan. Oryn alǵan jaǵdaılarda Túrkistan oblysy sanıtarııalyq-epıdemıologııalyq baqylaý departamentiniń aýmaqtyq basqarmalary tarapynan nysandarǵa jospardan tys tekserý júrgizilip, sanıtarııalyq-epıdemıologııalyq talaptardyń saqtalmaı óreskel kemshilikterge jol berilgendigi anyqtaldy, — dedi Túrkistan oblysy sanıtarııalyq-epıdemıologııalyq baqylaý departamenti basshysynyń orynbasary Asqar Ysqaqov.

Qazirgi tańda, óńirde 2 nysan jabylyp, polıtsııa bólimi tarapynan QK-niń 304-baby 1-bóligimen qylmystyq is ashylǵan. Sonymen qatar, departament tarapynan kásipkerlik nysandarynyń sanıtarııalyq-epıdemıologııalyq qorytyndy jáne qyzmetin bastaý týraly habarlama almaýyna baılanysty 231 nysanǵa profılaktıkalyq baqylaý nysanǵa barmaı júrgizilgen. Onda anyqtalǵan zań buzýdy joıý týraly usynymdar berilgen.

Aıta keteıik, budan buryn Túrkistan oblysynda balabaqshadaǵy 24 bala taǵamnan ýlanǵanyn jazǵan bolatynbyz.