Túrkistan oblysynda dene shynyqtyrý sabaǵynda 5-synyp oqýshysy qaza boldy

ASTANA. KAZINFORM - Prokýratýra oqýshynyń ólimine qatysty tergeý aıaqtalǵansha dene shynyqtyrý muǵalimin jumystan shettete turýdy usyndy.

Qaıǵyly oqıǵa Shardara aýdanyndaǵy Q. Amanjolov atyndaǵy jalpy bilim berý mektebinde boldy. Aldyn ala málimet boıynsha, oqýshy dene shynyqtyrý sabaǵynda qulap, jaraqat alǵan.

- Muǵalim men mektep feldsheri alǵashqy medıtsınalyq kómek kórsetip, balany Shardara aýdandyq aýrýhanasyna jetkizdi. Alaıda, dárigerler bar kúshin salǵanyna qaramastan, oqýshy ota kezinde qaıtys boldy. Oqıǵa oblystyq bilim basqarmasynyń baqylaýynda, - dep habarlady vedomstvo.

Muǵalim áli jumys istep jatyr, mektep qazirgi ýaqytta kúzgi demalysta. Alaıda, Shardara aýdandyq bilim bóliminiń basshysy Janat Musataevanyń aıtýynsha, prokýratýra tergeý júrgizilgenshe muǵalimdi ýaqytsha jumystan shettetý týraly usynys berdi.

- Bul másele kelesi aptada qaralady jáne muǵalim sabaq bastalǵanǵa deıin óz mindetinen ýaqytsha shettetiledi, - dep túsindirdi Janat Musataeva.

11 jastaǵy oqýshynyń ólimine baılanysty qylmystyq is qozǵaldy.

- Qazirgi ýaqytta polıtsııa sotqa deıingi tergeý júrgizip, barlyq mán-jaılardy anyqtaý úshin qajetti sharalardy qolǵa alyp jatyr. Tergeý nátıjesi boıynsha quqyqtyq baǵa berilip, zańǵa sáıkes protsessýaldyq sheshim qabyldanady, - dep habarlady Túrkistan oblysynyń polıtsııa departamenti.

Buǵan deıin Aqtóbede ákesiniń kóligin aıdap ketken jasóspirim jol apaty kezinde kóz jumǵanyn habarlaǵan edik.

Polıtsııanyń málimetinshe, oqýshy ákesiniń kóligin ruqsatsyz alyp ketip, aýyl ishinde júrip, aryqqa aýdarylyp ketken. Bala alǵan jaraqatynan qaıtys boldy.