Túrkistan oblysyndaǵy barlyq aýdan, qala ákimderi jer kodeksiniń talaptaryn buzyp, zańsyz qaýlylar shyǵarǵan
Túrkistan oblysyndaǵy barlyq aýdan, qala ákimderi jer kodeksiniń talaptaryn buzyp, zańsyz qaýlylar shyǵarǵan. Bul týraly Qazaqstan Respýblıkasy Sybaılas jemqorlyqqa qarsy is-qımyl agenttiginiń Túrkistan oblysy boıynsha departamentiniń basshysy Murat Tóleýbaev málimdedi, dep habarlaıdy QazAqparat tilshisi.
Sybaılas jemqorlyqqa qarsy is-qımyl agenttiginiń Túrkistan oblysy boıynsha departamenti oblys aýmaǵyndaǵy sýarmaly jerlerdi memleket muqtajy úshin jáne arnaıy jer qoryna alyp qoıý máselelerine syrtqy taldaý júrgizdi. Nátıjesinde aýktsıon ótkizbeı jer berý, ótkizilgen konkýrstardyń rásimderin saqtamaý, jerdiń nysanaly maqsatyn ózgertý, jer quqyqtaryn berýden bas tartý jáne taǵy basqa da sybaılas jemqorlyq táýekelderiniń belgileri anyqtaldy. Sondaı-aq, 2020-2023 jyldar aralyǵyndaǵy qyzmetterdi quraǵan syrtqy taldaý jumystary barysynda Jer kodeksiniń talaptaryn oblysqa qarasty barlyq aýdan, qala ákimderi buzǵany belgili boldy. Olar jer paıdalanýshylardan, ıaǵnı kásipkerlerden sýarmaly aýyl sharýashylyǵy alqaptaryn memleket muqtajy úshin alyp qoıý týraly zańsyz qaýlylar shyǵarǵan.
«Mundaı qaýly shyǵarý quzyreti Jer Kodeksiniń talaptaryna sáıkes, oblys ákiminiń ǵana quzyrettiligine jatady. Aýdan, qala ákimdikteriniń negizsiz áreketterimen kásipkerlerdiń quqyqtaryna nuqsan kelgen, onymen qosa baǵaly sýarmaly jer alqaptarynyń kólemi azaıǵan. Syrtqy taldaý nátıjesinde, aýdan, qala ákimdikteri tarapynan memleket muqtajy úshin sýarmaly jer ýchaskelerin alyp qoıýdyń zańsyz praktıkasy toqtatyldy» - dedi Murat Tóleýbaev.