Túrkistan oblysyndaǵy arheologııalyq eskertkishter maqta alqabynyń astynda búlinip jatyr — arheolog
TÚRKІSTAN. KAZINFORM — Óńirdegi ondaǵan kóne eskertkish joıylýdyń aldynda tur.
Óńirdegi arheologtar qytaılyq «Xinjiang Lihua (Group) Co., Ltd» kompanııasynyń qatysýymen iske asyp jatqan maqta sharýashylyǵyna qatysty ınvestıtsııalyq joba aıasynda ondaǵan tarıhı-mádenı eskertkish joıylyp jatyr dep dabyl qaǵyp otyr.
«Archeo-service» JShS atqarýshy dırektory, Túrkistan oblystyq tarıhı jáne mádenıet eskertkishterin qorǵaý komıssııasynyń múshesi Serik Aqylbektiń aıtýynsha, bul jaǵdaı aımaq tarıhy men mádenıetin orny tolmas shyǵynǵa ushyratqan.
— Memlekettik tizimge engen jáne anyqtalǵan, ıaǵnı tizimdegilermen teń dárejede qorǵalatyn birqatar nysan zań talaptary saqtalmaǵandyqtan zaqymdandy. Keıbir eskertkishter tolyq joıyldy, — dedi ol.
Arheologtyń sózine súıensek, 22–30 qazan aralyǵynda júrgizilgen saraptama barysynda aımaqtan 20 tarıhı, mádenı nysan anyqtalǵan. Olardyń barlyǵy arheologııalyq eskertkishter sanatyna jatady. Saraptama qorytyndysy maqta óndirisi úshin ıgerilgen aýmaqtarda eskertkishterdiń bastapqy qalpy buzylǵanyn, keıbiriniń joıylý aldynda turǵanyn kórsetken. Tolyqtaı kómilgen jáne joıylǵan nysandar qatarynda tórt kóne sý arnasy — Aqynjaqyp, 1-shi, 2-shi jáne 3-shi Shubara bar. Tostaǵan arnasy jartylaı búlingen. Bir qonys tolyǵymen joıylǵan. Sondaı-aq Tostaǵan qorymyndaǵy obalardyń jartysyna jýyǵy joǵalyp, memlekettik tizimge engen Qotan eskertkishiniń 12 qorǵanynyń 11-i búlingen.
Oblys ákimdigi bul jaǵdaıǵa qatysty túsinikteme berip, aýyl sharýashylyǵy salasyndaǵy jumystardyń qoldanystaǵy zańnama talaptaryna sáıkes júrgizilip jatqanyn atap ótti.
— Túrkistan oblysynda 2 myńǵa jýyq tarıhı-mádenı eskertkishter bar. Qazaqstan Respýblıkasynyń «Tarıhı-mádenı mura obektilerin qorǵaý jáne paıdalaný týraly» zańyna sáıkes, tarıhı, arheologııalyq nemese mádenı qundylyǵy bar aýmaqtarda kez kelgen qurylys, jer qazý nemese sharýashylyq qyzmetin bastamas buryn ýákiletti memlekettik organdarmen kelisý jáne saraptama júrgizý mindetti. Bul talaptardy ákimdik tolyqtaı túsinip, qatań saqtap keledi.
Qazirgi ýaqytta arheologtardan tek bir aýdanǵa qatysty resmı ótinish túsken. Buǵan baılanysty ákimdik tıisti ýákiletti organdarǵa, quqyq qorǵaý organdaryna resmı hat joldady. Sonymen qatar, Mádenıet mınıstrliginiń resmı qorytyndysy alynýy tıis, bul — zań talaby.
Eger kórsetilgen aýmaqtarda tarıhı-mádenı mura obektileriniń bary ǵylymı turǵyda dáleldense, onda atalǵan jerlerdegi jumys dereý toqtatylyp, nysandar Qazaqstan zańnamasyna sáıkes qorǵaýǵa alynady, — delingen Túrkistan oblysy ákimdigi usynǵan aqparatta.
Aıta keteıik, budan buryn Túrkistan oblysynda belgisiz adamdar áskerı nysanǵa basyp kirmek bolǵanyn jazǵan bolatynbyz.