Túrkistan oblysyndaǵy 9 oblystyq, 1 respýblıkalyq mańyzy bar avtomobıl joly jabyq
Túrkistan oblysyndaǵy respýblıkalyq mańyzy bar jolda 300-den astam júk kóligi qar qursaýynda qaldy, dep habarlaıdy Kazinform.
Qazirgi kezde Túrkistan oblysy Tótenshe jaǵdaılar departamenti janynan jedel shtab qurylyp, jumys istep jatyr. Óńirdegi respýblıkalyq mańyzy bar jolda qar qursaýynda qalǵan 61 jolaýshy qaýipsiz jerge jetkizildi.
«Boran áli basylǵan joq. Óńirdegi 9 oblystyq, 1 respýblıkalyq mańyzy bar avtomobıl joly jabyq. Polıtsııa departamenti men Tótenshe jaǵdaı departamentiniń jáne jol qyzmetteriniń kúshterimen jáne quraldarymen jumys istep jatyrmyz. Jolda qalǵan jolaýshylar qaýipsiz jerge jetkizilýde. Oblys turǵyndaryn uzaq jolǵa shyqpaýlaryn eskertemiz» - dedi Túrkistan oblysy TJD tótenshe jaǵdaılardy joıý basqarmasynyń bastyǵy Talǵat Dosalıev.
Aıta keteıik, budan buryn qatty aıazdan Túrkistan oblysynda joldar jabylyp, mektepter onlaınǵa kóshkenin jazǵan bolatynbyz.
Sondaı-aq Túrkistan oblysyndaǵy trassalarda 4 jylytý beketi jumys istep tur.
