Túrkistan oblysyndaǵy 33 lagerdiń 17-si ǵana oń qorytyndy aldy

TÚRKІSTAN. KAZINFORM – Óńirdegi jazǵy saýyqtyrý lagerleriniń sanıtarlyq jaǵdaıy qatań baqylaýda. Bul týraly Túrkistan oblysynyń sanıtarııalyq-epıdemıologııalyq baqylaý departamenti basshysynyń orynbasary Asqar Ysqaqov málimdedi.

Jaz mezgilinde mektep oqýshylaryna 33 saýyqtyrý lageri qyzmet kórsetedi. Onda 70 myń bala demalady dep josparlanǵan. Sonyń ishinde 50 myń balaǵa áleýmettik jaǵdaıyna baılanysty bıýdjet esebinen tegin joldama berilse, 20 myń jetkinshek lagerge aqyly túrde barady. Sonymen qatar «Qazaqstan halqyna» qory esebinen oblysta jalpy 3421 oqýshy jazǵy saýyqtyrý lagerlerimen tegin qamtylady.

«Búginde Túrkistan oblysyndaǵy balalardy saýyqtyrýǵa arnalǵan jazǵy demalys mekemeleriniń sanıtarlyq-epıdemıologııalyq jaǵdaıyn qadaǵalaý sharalary júrgizilip jatyr. Osy oraıda lager qyzmetkerleriniń gıgıenalyq daıyndyǵy tekserilip, aldyn ala medıtsınalyq tekserýden ótýi baqylaýǵa alynǵan. Bıyl oblys kóleminde 33 jazǵy saýyqtyrý lageriniń ashylýy josparlanǵan. Onyń 17-i jergilikti sanıtarııalyq-epıdemıologııalyq baqylaý basqarmasy tarapynan tekserilip, oń qorytyndy aldy. Al, 3 lagerdiń sanıtarlyq kemshilikteri túzetilip jatyr. Qalǵan demalys oryndaryn sanıtarlyq talaptarǵa sáıkestendirý úshin tıisti jumystar júrip jatyr», - dedi Asqar Ysqaqov.