Túrkistan oblysyndaǵy 12 adamnyń qazasy: Úkimettik komıssııa quryldy

ASTANA. KAZINFORM — Prezıdenttiń tapsyrmasy boıynsha Túrkistan oblysyndaǵy órtke baılanysty Úkimettik komıssııa qurylǵany anyqtaldy. Bul týraly Úkimettiń baspasóz qyzmeti málim etti.

Vedomstvo málimetinshe, Premer-mınıstrdiń orynbasary Qanat Bozymbaevtyń tóraǵalyǵymen qurylǵan komıssııa quramyna Tótenshe jaǵdaılar, Іshki ister, Densaýlyq saqtaý, Eńbek jáne halyqty áleýmettik qorǵaý mınıstrlikteriniń, Túrkistan oblysy ákimdiginiń basshylyǵy engizildi.

— Memleket basshysynyń tapsyrmasy boıynsha Túrkistan oblysy Jetisaı aýdany Alǵabas aýylyndaǵy jeke úıde bolǵan órttiń sebepterin tergeý jónindegi Úkimettik komıssııa quryldy. Premer-mınıstrdiń orynbasary Qanat Bozymbaevtyń tóraǵalyǵymen qurylǵan komıssııa quramyna Tótenshe jaǵdaılar, Іshki ister, Densaýlyq saqtaý, Eńbek jáne halyqty áleýmettik qorǵaý mınıstrlikteriniń, Túrkistan oblysy ákimdiginiń basshylyǵy engizildi. Zardap shekkender men qaza tapqandardyń otbasylaryna barlyq qajetti medıtsınalyq jáne psıhologııalyq kómek kórsetiledi. Ákimdikke órt saldarynan qaza tapqandardy jerleýdi uıymdastyrýǵa járdemdesý tapsyryldy. Tergeý qorytyndysy boıynsha qosymsha sheshimder qabyldanatyn bolady. Komıssııanyń jumysy erekshe baqylaýda, — delingen resmı aqparatta.

Eske salsaq, Túrkistan oblysy Jetisaı aýdanynyń Alǵabas aýylynda eki qabatty jeke turǵyn úı órtenip, 12 adam mert boldy. Onyń 9-y bala.

Prezıdent Qasym-Jomart Toqaev órt saldarynan kóptegen adamnyń qaza tabýyna baılanysty kóńil aıtyp, Úkimet pen Túrkistan oblysynyń ákimine zardap shekken azamattardyń týǵan-týystaryna barlyq qajetti kómek kórsetip, qaıǵyly oqıǵany jan-jaqty tekserýdi tapsyrdy.

QR Bala quqyqtary jónindegi ýákil Dınara Zákıeva órt shyqqan úıde eki otbasy, ata-analary men balalary turǵanyn habarlady.