Túrkistan oblysynda júrgizýshiler jóndeýden keıin búlingen jolǵa narazy
TÚRKІSTAN. KAZINFORM — Jýyrda jóndelgen tas joldyń qaıtadan jaramsyz kúıge túsýi qoǵam tarapynan synǵa ushyrap otyr.
Áleýmettik jelilerde Shymkent qalasynan Ózbekstan shekarasyna deıingi baǵyttaǵy avtojoldyń jaı-kúıin synǵa alǵan beınejazba tarap jatyr. Beınerolık avtorynyń aıtýynsha, jol jamylǵysy jóndeý jumystary aıaqtalǵannan keıin bir aıǵa tolmaı jatyp-aq búlingen.
— Bireýler muny aýyr kólikter buzdy der. Biraq jol ne úshin salynady, eger ol kólikterge arnalmasa? Merdiger sapasyz jasasa, ol úshin júrgizýshi kináli emes. Qalyń, sapaly asfalt tóseý kerek edi, — deıdi beınerolık avtory.
Bul másele boıynsha jaýap bergen «QazAvtoJol» ulttyq kompanııasynyń málimetinshe, beınekadrda kórsetilgen jaǵdaı respýblıkalyq mańyzy bar A-15 «Jyzaq — Gagarın — Jetisaı — Kırovskıı — Qyzylásker — Saryaǵash — Abaı — Jibek joly» avtojolynyń 156-190 shaqyrym aralyǵynda tirkelgen. Bul ýchaskede uzyndyǵy 34 shaqyrymdy quraıtyn (III tehnıkalyq sanat) ortasha jóndeý jumystary júrgizilip jatyr. Joba aıasynda eski jabyndy joný, eki qabatty asfaltbeton tóseý jáne jol jıegin nyǵaıtý jumystary kózdelgen. Jobany tolyq aıaqtaý merzimi 2025 jyldyń qazanyna belgilengen.
— 2025 jylǵy shilde aıynda 157-175 shaqyrym (uzyndyǵy 18 km) aralyǵynda asfaltbeton jamylǵysynda oıyqtar men shuńqyrlar túrinde aqaýlar anyqtaldy. Bul jaǵdaı aýyr júk kólikteriniń ruqsat etilmegen qozǵalysy men belgilengen tártipti óreskel buzýynan týyndady. Eskertý belgileriniń ornatylǵanyna qaramastan, keıbir júrgizýshiler jańadan tóselgen jabynmen júrýin jalǵastyryp, onyń tolyq qatýyna jáne beriktik qasıetteriniń qalyptasýyna kedergi keltirdi, — delingen «QazAvtoJol» kompanııasy taratqan aqparatta.
Sondaı-aq, kompanııa atalǵan ýchaske boıynsha jumystardyń qabyldanbaǵynyn jáne qarajattyń tólenbegendigin jetkizdi.
— Jóndeý jumystary shekteýli jaǵdaıda júrgizilip jatyr. Balama aınalma jol qarastyrylmaǵan, al kólik aǵynynyń qarqyndylyǵy táýligine 15 myńnan asady. Sonymen qatar, óńirde aýa temperatýrasy +45, +50S-qa deıin jetetin aptap ystyq baıqaldy. Qazaqstan Respýblıkasy Indýstrııa jáne ınfraqurylymdyq damý mınıstriniń 2023 jylǵy 5 shildedegi № 492 buıryǵyna sáıkes, 1 maýsymnan 31 tamyzǵa deıingi kezeńde aýa temperatýrasy +25S-tan asqan jaǵdaıda saǵat 10:00–den 22:00–ge deıin aýyr júk kólikteriniń (jeke óske túsetin salmaǵy 8 tonnadan joǵary) qozǵalysyna Túrkistan oblysynda shekteý engizildi. Alaıda bul talaptar jıi eskerilmeı, óreskel buzylyp jatyr. Anyqtalǵan aqaýlarǵa baılanysty jóndeý jumystary ýaqytsha toqtatyldy. Qalpyna keltirý sharalary merdigerdiń óz qarajaty esebinen júrgizilýde, bıýdjet qarajaty tartylmaıdy, - delingen aqparatta.
Aıta keteıik, budan buryn Túrkistandaǵy joldardan kemshilikter anyqtalǵanyn jazǵan bolatynbyz.