Túrkistan oblysynda júrgizilgen aýdıt 297,2 mlrd teńge kólemindegi zań buzýshylyqty anyqtady

TÚRKІSTAN. KAZINFORM — Túrkistan oblystyq tekserý komıssııasy tarapynan 2025 jyly 15 aýdıtorly is-shara júrgizilgen, onyń aıasynda 295 memlekettik aýdıt nysany qamtyldy.

Oblystyq tekserý komıssııasynyń tóraǵasy Ǵalymjan Tapeevtyń aıtýynsha, ótken jyly óńirde aýdıt júrgizilgen qarajat kólemi 637,8 mlrd teńge bolǵan. Tekserý nátıjesinde 297,2 mlrd teńge kólemindegi zań buzýshylyq anyqtaldy.

— Onyń ishinde 55,2 mlrd teńge bıýdjet qarajaty men memleket aktıvterin tıimsiz josparlaý jáne paıdalanýǵa tıesili bolsa, 242 mlrd teńgesi — qarjylyq tártiptiń buzylýy. Sonymen qatar, 1 095 rásimdik tártip buzýshylyq tirkeldi. Qalpyna keltirýge jatatyn qarjylyq tártip buzýdyń jalpy kólemi 241,6 mlrd teńgeni qurap, onyń 27,5%-y qalpyna keltirildi. Sonymen qatar 331,7 mln teńge kólemindegi qarjynyń 199 mln teńgesi, ıaǵnı 60%-y óteldi, — dedi ol.

Komıssııa tóraǵasynyń málimdeýinshe, quqyq qorǵaý organdaryna protsestik sheshim qabyldaý úshin 8 materıal joldanǵan.

— Sonymen qatar, 252 laýazymdy tulǵa tártiptik jaýapkershilikke tartyldy. Ákimshilik jaýapkershilikke tartý maqsatynda 255 materıal joldanyp, 183 materıal boıynsha 64,6 mln teńge kóleminde aıyppul salyndy, — dedi ol.

Budan buryn Túrkistan oblysynda 1,1 mlrd teńgeden astam qarajat bızneske qaıtarylǵanyn jazǵan edik.