Túrkistan oblysynda jumyssyzdyqpen kúres qalaı júrip jatyr
TÚRKІSTAN. KAZINFORM – Búginde óńirde 2 mln 150 myńnan astam turǵyn bolsa, ekonomıkalyq belsendi halyq sany – 861 913 adam. Onyń ishinde jumyspen qamtylǵandar sany – 822 014 (jaldamaly qyzmetkerler – 442 211, ózdiginshe jumyspen qamtylǵandar – 379 803).
Qazirgi tańda Túrkistan oblysynda 40 myńǵa jýyq jumyssyz azamat bar. 2025 jyly jumyspen qamtý kartasy sheńberinde 130 769 jańa jumys ornyn qurý kózdelgen. Bul respýblıka boıynsha qurylatyn jumys oryndarynyń 14,5 paıyzyn qurap, eń joǵary kórsetkish bolyp qalyptasty.
Ótken jyldyń qorytyndysymen 147 719 azamat jumyspen qamtylyp, jospar artyǵymen oryndalǵan. Onyń ishinde 100 046 turaqty jumys orny qurylsa, 47 673 ýaqytsha jumys orny jasaqtalǵan. Jumyssyzdyq deńgeıi 4,6%-dy kórsetip, tómendegen.
Oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Mekenhan Qozyhanulynyń aıtýynsha, eńbekpen qamtý 5 baǵyt boıynsha júrgizilgen.
– 4074 jumys orny ulttyq jobalar men jeke ınvestıtsııalyq jobalar sheńberinde qurylsa, 22 595 jumys orny «10 myń turǵynǵa 100 jańa jumys orny» sheńberinde ashylǵan. 45 myń adam sýbsıdııalanatyn jumys oryndaryna jiberilse, 57 221 adamdy eńbek naryǵyndaǵy bos oryndar arqyly jumysqa ornalastyrý jáne 1793 adamǵa grant berý kózdelip, tıisti ındıkator oryndalǵan, – dedi ol.
Al 2026 jylǵa arnalǵan «Óńirlik jumyspen qamtý kartasy» aıasynda 74 516 adamdy (54481 – turaqty, 20035 – ýaqytsha) jumyspen qamtý josparlanyp otyr.
– Onyń ishinde 40 588 adam bos jumys oryndaryna joldansa, 2472 turǵyn ulttyq jobalar negizinde ashylatyn jumys oryndaryna tartylady. 11476 turǵyn «10 myń turǵynǵa 100 jańa jumys orny» jobasy, al 18530 adam sýbsıdııalanatyn jumys oryndary arqyly eńbekke tartylady dep josparlanǵan. 1450 adamǵa grant berý mejelengen, – dedi Mekenhan Qozyhanuly.
Turǵyndar oblystaǵy ınfraqurylymdyq jobalardy júzege asyrý, ónerkásip jáne kásipkerlik, týrızm, aýyl sharýashylyǵy salalaryna joldanady. Onyń ishinde «Túrkistan maqta agroónerkásiptik kesheni» jáne «JASYL SUYQ QAZAQSTAN» kompanııalaryna taǵy myńnan astam turǵyndy jumysqa ornalastyrý kózdelip otyr.
Budan buryn otandyq óndiristi damytý jáne qaıta óńdeýdi qoldaý maqsatynda Túrkistan oblysynda «Shaǵyn óndiristik park» jobasy qolǵa alynǵanyn jazǵan edik. Joba aıasynda 248 ǵımarat salyp, 5 myńǵa jýyq jumys ornyn qurý josparlanǵan. Qazirgi ýaqytta 40 ǵımarat salynyp, 32 joba iske qosyldy. 2 myńǵa jýyq jumys orny ashyldy.