Túrkistan oblysynda jumys ýaqytynda shetelge ketken bilim qyzmetkerlerine jalaqy tólengen
ASTANA. KAZINFORM – Túrkistan oblysynda prokýratýra bilim berý salasynda bıýdjet qarajatynyń negizsiz jumsalý derekterin anyqtady.
Saryaǵash aýdanynyń prokýratýrasy aýdandyq bilim bólimi men oǵan qarasty bilim berý uıymdarynda Eńbek jáne Bıýdjet kodeksteri talaptarynyń saqtalýyna taldaý júrgizdi.
Tekserý barysynda birqatar bilim berý qyzmetkerleriniń jumys ýaqytynda jáne sabaq ótkizý kezeńinde shetelge shyǵyp ketkeni anyqtalǵan. Alaıda jumys ornynda bolmaǵanyna qaramastan, olarǵa jalaqy tolyq kólemde eseptelip, tólengen.
– Aýdandyq bilim bólimi qyzmetkerleriniń, sondaı-aq mektep muǵalimderi men jumysshylarynyń sabaq jáne jumys ýaqytynda shetelge shyǵý faktileri tirkeldi. Taldaý qorytyndysy boıynsha bilim bólimi qyzmetkerlerine qatysty 389 myń teńgeden astam, al bilim berý uıymdary boıynsha jalpy 15 mln teńgeden astam bıýdjet qarajatynyń negizsiz jumsalǵany anyqtaldy, – dep habarlady prokýratýradan.
Prokýrorlyq qadaǵalaý aktisi negizinde jumys ýaqytynda shetelge shyqqan qyzmetkerlermen qatar, atalǵan zań buzýshylyqtarǵa jol bergen basshylar tártiptik jaýapkershilikke tartyldy.
Qabyldanǵan sharalardyń nátıjesinde memleket kirisine 15 mln teńgeden astam qarajat óndirilip, 680 adam jaýapkershilikke tartyldy.
Aıta keteıik, Kókshetaýda 600-ge jýyq medıtsına qyzmetkeri jalaqylarynyń keshikkenine shaǵymdandy.
