Túrkistanda turǵyndardy jalǵan jumysqa ornalastyrýmen aınalysqan top sottaldy

TÚRKІSTAN. KAZINFORM – Túrkistan qalasynda jumysqa ornalastyrylǵan azamattardyń jalaqysyn sýbsıdııalaýǵa bólingen bıýdjet qarajatyn jymqyrý faktisi boıynsha aıyptaý úkimi shyqty.

Tergeýdi QMA Túrkistan oblysy boıynsha departamenti júrgizgen. Belgili bolǵandaı, Eńbek mobıldiligi ortalyǵynyń burynǵy dırektory, Jumys berýshilerdi qoldaý bóliminiń qyzmetkeri jáne birneshe kommertsııalyq uıym basshylary azamattardy sýbsıdııalanatyn jumys oryndaryna jalǵan rásimdeý arqyly bıýdjet qarajatyn zańsyz alý shemasyn uıymdastyrǵan.

Tergeý derekterine sáıkes, ortalyq qyzmetkeri kásipkerlerdiń elektrondyq tsıfrlyq qoltańbalaryn paıdalanyp, memlekettik baǵdarlamalarǵa qatysýǵa jalǵan ótinim bergen. Ótinimderde kórsetilgen laýazymdar shyndyqqa sáıkes bolmaǵan. Ótinimder maquldanǵan soń, eńbek mindetterin is júzinde oryndamaǵan adamdardy jumysqa qabyldaý týraly buıryq rásimdelgen.

Kásipkerler óz tanystary men týystaryn memlekettik qoldaý baǵdarlamasyna qatysýǵa úgittep, banktik shot ashýdy usynǵan. Anyǵynda, bul shottar jalǵan qyzmetkerlerge tólem júrgizý úshin paıdalanylǵan.

- Aı saıyn júıege jalǵan jumys ýaqyty týraly tabelder engizilip otyrǵan. Sol qujattar negizinde tólemder «jumysshylardyń» shottaryna aýdarylǵan. Qarajat keıin qolma-qol sheshilip, bólim qyzmetkerine berilgen, ol qarajatty qatysýshylar arasynda úlestirip otyrǵan.

Zertteý barysynda 78 adamnyń jalǵan eńbekke ornalastyrylǵany, al memleketke kelgen shyǵynnyń 49 mln teńgeden asqany anyqtaldy, - dep jazdy departamentten.

Sot úkimimen úsh kinálige 4 jyl 6 aıdan 5 jylǵa deıin bas bostandyǵynan aıyrý jazasy taǵaıyndaldy. Taǵy eki kásipkerge 4 jyl 6 aıǵa bas bostandyǵyn shekteý jazasy belgilendi.

Memleketke keltirilgen zalal sottalýshylar tarapynan tolyq ótelgen. Úkim zańdy kúshine engen joq.

Aıta keteıik, buǵan deıin Túrkistan oblysynda veterınarlar 271 mln teńge sýbsıdııany jymqyrǵany habarlandy.