Túrkistan oblysynda júkti áıel men eki balany qaǵyp óltirgen mas júrgizýshi sottaldy
TÚRKІSTAN. KAZINFORM — Túrkistan oblysynyń qylmystyq ister jónindegi mamandandyrylǵan aýdanaralyq soty Arys qalasynda úsh adamnyń ómirin qıǵan jol apatyna qatysty qylmystyq is boıynsha úkim jarııalady.
Túrkistanda ótken sot protsesine sýdıa Marat Kúzdeýbaev tóraǵalyq etti. Memlekettik aıyptaýshy 52 jastaǵy sottalýshyny 10 jylǵa bas bostandyǵynan aıyrýdy jáne kólik quraldaryn basqarý quqyǵynan ómir boıyna aıyrýdy surady. Prokýror sottalýshynyń 14 jasqa tolmaǵan balasy bar ekenin eskerip, jazany óteýdi bir jylǵa keıinge qaldyrýdy usyndy.
Qaza tapqandardyń týystary sottan kinálige barynsha qatań jaza taǵaıyndaýdy surady. Olar sottalýshyny keshirmeıtinderin málimdedi.
Buǵan deıin muǵalim bolyp jumys istegen sottalýshy óz kinásin moıyndap, jasaǵan isine ókinetinin aıtty. Sondaı-aq múgedektigi bar kámeletke tolmaǵan qyzyn tárbıelep otyrǵanyn aıtyp, jazany jeńildetýdi ótindi.
Sot úkimimen áıel 9 jylǵa bas bostandyǵynan aıyryldy. Sondaı-aq kólik quraldaryn basqarý quqyǵynan ómir boıyna shettetildi. Jazany óteý bir jylǵa keıinge qaldyryldy.
Sondaı-aq sot jábirlenýshilerdiń moraldyq zııandy óteý týraly azamattyq talaptaryn ishinara qanaǵattandyrdy. Apat saldarynan qyzynan aıyrylǵan Dana Úsimbek pen Erdáýlet Sapardyń paıdasyna talap etilgen 20 mln teńgeniń ornyna 15 mln teńge óndiriletin boldy. Jol apatynan áıeldiń ózi men uly da jaraqattanǵan.
Balasynan aıyrylǵan Samat Aıdarovqa 10 mln teńge ótemaqy taǵaıyndaldy. Ol 50 mln teńge talap etken. Al Aıdana Iskakovanyń týǵan ápkesiniń qazasyna baılanysty moraldyq zııan retinde 10 mln teńge óndirildi. Ol bastapqyda 15 mln teńge talap etken.
Sot úkimi zańdy kúshine engen joq jáne oǵan shaǵym túsirýge bolady.
Eske sala keteıik, qaıǵyly oqıǵa 2026 jylǵy 6 maýsymda Arysta bolǵan.
Іs materıaldaryna sáıkes, JAC kóligin tizgindegen áıel alkogoldik masań kúıde bolǵan. Ol jeke úıdiń janyndaǵy oryndyqta otyrǵan adamdardy kóligimen qaǵyp, keıin oqıǵa ornynan qashyp ketken.
Jol apatynan úsh adam — 29 jastaǵy júkti áıel, onyń eki jasar uly jáne bes jasar qyz bala qaza tapty.
