Túrkistan oblysynda juqpaly aýrýlarǵa arnalǵan tósek-oryn kóbeıtildi

Túrkistan oblysynda qyzylsha juqtyrǵan balalar kóp, dep habarlaıdy Kazinform.

Túrkistan oblysynda qyzylsha juqtyrǵandardyń kópshiligi balalar. Máselen, ótken jyly 2000 astam naýqasqa «qyzylsha» dıagnozy qoıylsa, onyń basym bóligin 14 jasqa deıingi balalar quraǵan. Al, bıyl óńirde qyzylsha ınfektsııasynyń 15 jaǵdaıy tirkeldi. Onyń ishinde 14 jasqa deıingi 11 bala bar.

Jalpy óńirde qyzylshaǵa qatysty epıdemıologııalyq ahýaldy turaqtandyrý úshin birqatar sharalar qolǵa alynyp otyr. Epıdemıologııalyq ahýalǵa baılanysty medıtsınalyq uıymdarda juqpaly aýrýlarǵa arnalǵan qosymsha 407 tósek-oryn jasaqtalyp, jalpy sany 1032-ge jetti.

«Qosymsha jappaı ımmýndaý sheńberinde 152344 bala qyzylshaǵa qarsy vaktsına saldyrdy. Ata-anardy balalaryn qyzylshaǵa qarsy ekpe alýǵa shaqyramyz, qyzylshamen aýyrǵan adamda aýyr asqynýlar oryn alýy múmkin. Al, ekpe saldyrǵan adamda ómirlik ımmýnıtet qalyptasady» - dedi oblystyń bas memlekettik sanıtarlyq dárigeri Nurbek Nyshanov.