Túrkistan oblysynda JRVI-men aýyrǵan balalar 190 myńǵa jýyqtaǵan
TÚRKІSTAN. KAZINFORM — Túrkistan oblysynda jiti respıratorlyq vırýstyq ınfektsııany juqtyrǵandar sany artqan.
Túrkistan oblystyq sanıtarııalyq-epıdemııalogoııalyq baqylaý departamentiniń málimetinshe, 2025 jyldyń 11 aıynda oblysta JRVI ınfektsııasymen syrqattanǵan 313 173 naýqas tirkelip, 2024 jyldyń kórsetkishimen salystyrǵanda 28,3%-ǵa ósken. Aýyrǵandardyń basym bóligi — 14 jasqa deıingi balalar, ıaǵnı 189 836 jaǵdaı tirkelgen.
Bıyl óńirge tumaýǵa qarsy reseılik «Grıppol+» ekpesiniń 271 348 danasy bólinip, turǵyndarǵa tolyq salynǵan. Soǵan qaramastan ótken jylmen salystyrǵanda tumaýmen aýyrý 13,6 esege joǵarylaǵan. Al taǵamnan ýlaný 25,8%-ǵa ósken.
Brıfıngte belgili bolǵandaı, jyl basynan beri óńirdegi nysandardyń sanıtarııalyq talaptarǵa sáıkestigi boıynsha 193 nysan tekserilgen.
— Nátıjesinde anyqtalǵan kemshilikter negizinde 191 tulǵaǵa 59 mln 628 myń teńge aıyppul salyndy. Kemshilikterdi joıý týraly 122 nusqama berildi. Sondaı-aq, jyl basynan beri 1 236 tergep-tekserý júrgizildi. Oǵan sáıkes, 628 nysanda zańbuzýshylyqtar anyqtalyp, 581 tulǵaǵa 43 mln 349 myń teńge kóleminde aıyppul salyndy. Oblystaǵy ortalyqtandyrylmaǵan aýyz sý kózderine sanıtarııalyq-hımııalyq kórsetkishter boıynsha 227 sý synamasy tekserilip, 23 synama talapqa sáıkes kelmegen, — dedi departament basshysy Nurbek Nyshanov.
Budan bólek, jyl basynan beri óńirde tamaqtan ýlanýdyń 3 jaǵdaıy (Túrkistan qalasy men Saıram aýdanynda) tirkelip, 108 adam zardap shekken. Al botýlızm boıynsha 3 jaǵdaı tirkelgen, zardap shegýshi — 6 adam. Ýlanýǵa sebep bolǵan — úı jaǵdaıynda daıyndalǵan konservilengen qııar, qyzanaq, kókónisten jasalǵan salat ónimderi.
Budan buryn Túrkistanda adamdar sýshıdan ýlanǵan kafe qaıtadan zańsyz jumys istegenin jazǵan edik.