Túrkistan oblysynda jóndelgen jol eki aıǵa jetpeı oıyla bastady
TÚRKІSTAN. KAZINFORM — Túrkistan oblysynyń Keles aýdanynda respýblıkalyq mańyzy bar avtomobıl jolynyń sapasyna qatysty turǵyndardan shaǵym tústi.
Áleýmettik jelide taraǵan beınejazbada turǵyn asfalt tóselgenine shamamen bir aı bolǵan joldyń qazirgi jaǵdaıyna alańdaýshylyq bildirdi.
Onyń aıtýynsha, Abaı aýyly jaǵynan Jetisaı baǵytyna qaraı, Lesbek batyr eldimekenine jetpeı, ıAllama ótkizý pýnktine qaraı ótetin avtomobıl jolynyń keı bólikteri syn kótermeıdi.
— Bul jolǵa asfalt tóselgenine nebári bir aıdaı ýaqyt ótti. Alaıda qazirdiń ózinde joldyń keı bólikteri oıylyp, shuńqyrlar paıda bolǵan. Keı jerlerde qarsy baǵyttaǵy kólikter joldyń shuńqyrly bóligin aınalyp ótýge májbúr. Bul jol arqyly Ózbekstan, Tájikstan, Aýǵanstan jáne Iran baǵytyndaǵy kólikter qatynaıdy. Joldaǵy aqaýlar kólik júrgizýshilerine qıyndyq týǵyzyp otyr, — dedi turǵyn.
Atalǵan jaǵdaıǵa qatysty «QazAvtoJol» UK» AQ Túrkistan oblystyq fılıaly túsinikteme berdi.
Fılıal málimetinshe, 2023-2025 jyldar aralyǵynda respýblıkalyq mańyzy bar A-15 «Jyzzaq — Gagarın — Jetisaı — Kırov — Saryaǵash — Jibek joly» avtomobıl jolynyń 74-220 shaqyrym aralyǵyndaǵy jekelegen ýchaskelerinde jalpy uzyndyǵy 47,8 shaqyrym bolatyn ortasha jóndeý jumystary atqarylǵan.
Jóndeý jumystaryn «AlemTransJol» JShS oryndaǵan. Al atqarylǵan jumystardyń sapasyna tehnıkalyq qadaǵalaýdy «Amanat Expert KZ» JShS júzege asyrǵan. Qazirgi ýaqytta jóndelgen jol ýchaskeleri kepildik merziminde.
«QazAvtoJol» málimetinshe, 2026 jylǵy 25 tamyzda fılıal qyzmetkerleri joldy tekserý barysynda jekelegen ýchaskelerde asfaltbeton jabynynda yǵysý túrindegi aqaýlardy anyqtaǵan. Osyǵan baılanysty merdiger «AlemTransJol» JShS-ne anyqtalǵan aqaýlardy kepildik mindettemeleri aıasynda shuǵyl túrde joıý jáne jol qozǵalysy qaýipsizdigin qamtamasyz etý tapsyrylǵan.
Al turǵyndardyń shaǵymyna sebep bolǵan ýchaskede sońǵy jóndeý 2026 jylǵy 28 maýsymda júrgizilgen.
— Áleýmettik jelilerde 149-151 shaqyrym aralyǵyndaǵy jol ýchaskesinde asfaltbeton jabynynyń yǵysýy týraly aqparat tarady. Qazirgi ýaqytta «QazAvtoJol» Túrkistan oblystyq fılıaly merdiger uıymmen birlesip, anyqtalǵan aqaýlardy joıý boıynsha jumystar júrgizip jatyr. Merdigerge zaqymdanǵan ýchaskelerde normatıvtik-tehnıkalyq talaptardy saqtaı otyryp, qysqa merzimde jóndeý-qalpyna keltirý jumystaryn júrgizý tapsyryldy, — delingen resmı jaýapta.
Aqaýlardy joıý jumystary merdiger uıymnyń qarajaty esebinen, kepildik mindettemeleri aıasynda júrgiziledi. Jumystar aıaqtalǵannan keıin olardyń sapasyna qaıta tekserý júrgizilmek.
Buǵan deıin Túrkistan oblysynda turǵyndar Batys Eýropa — Batys Qytaı jolynyń sapasyna shaǵymdanǵanyn jazǵan edik.
