Túrkistan oblysynda joldyń búlinýine júk kólikteri sebep bolǵan

TÚRKІSTAN. KAZINFORM - Respýblıkalyq mańyzy bar joldardyń sapasyna júktemesi aýyr tehnıkalar eleýli áser etip jatyr.

Túrkistan oblysynda jyl basynan beri 520 sharshy metr jol tósemi aýyr júk kólikteriniń saldarynan búlingen. Bul týraly «Ulttyq sapa ortalyǵynyń» Túrkistan oblystyq fılıaly habarlady.

Ortalyqtyń ınjeneri Nurjan Áshirmattyń málimetinshe, aqaýlardyń kópshiligi Shymkent qalasynyń soltústik aınalma joly boıynan anyqtalǵan. Atap aıtqanda, joldyń alǵashqy 7 shaqyrymynda jolaq syzyqtary tozyp, múlde kórinbeı qalǵan. Sondaı-aq 2260-2270 shaqyrym aralyǵynda da osyndaı jaǵdaı qaıtalanǵan. Atalǵan trassadaǵy 120 sharshy metr betonnyń qorǵanys qabaty buzylǵan.

– Bul – tek bıyl tirkelgen derekterdiń bir bóligi ǵana. Aýyr júk kólikteri, ásirese, karerlerden qum-qıyrshyq tas tasyǵan mashınalar jol tóseminiń merziminen buryn tozýyna sebep bolyp otyr, – deıdi Nurjan Áshirmat.

Mamandardyń aıtýynsha, joldyń uzaq saqtalýy úshin tehnıkalyq talaptar qatań saqtalýy qajet. Alaıda belgilengen salmaq normalaryn eskermeıtin kólik júrgizýshileri jol ınfraqurylymyna úlken zalal keltirip jatyr.

Aıta keteıik, budan buryn Túrkistan oblysynda jýyrda jóndelgen tas joldyń qaıtadan jaramsyz kúıge túskenin jazǵan bolatynbyz.