Túrkistan oblysynda jolda qalǵan 500-ge jýyq jolaýshyǵa nan men ystyq tamaq taratyldy

Eriktiler jolda qalǵan árbir kólikke as jetkizip berip jatyr, dep habarlaıdy Kazinform.

Túrkistan oblysynyń birqatar aımaqtarynda burqasyn jel saldarynan respýblıkalyq jáne oblystyq mańyzy bar joldar jabylǵan bolatyn. Onyń ishinde, Túlkibas aýdanynyń Jaskeshý, Sastóbe eldi mekenderinen ótetin A-2 «Almaty – Tashkent» avtomobıl jolynyń 593-654 shaqyrymynda barlyq avtokólikterdiń júrýine shekteý qoıyldy. Túrkistan oblysynyń qutqarýshylary, Túlkibas aýdanynyń ákimdigi men aýyl turǵyndary tarapynan atalǵan trassada qalǵan azamattardy qutqarý, júrgizýshiler men jolaýshylardy ystyq tamaqpen, ystyq sýsynmen qamtý jumystary jalǵasýda.

Sonymen qatar Saıram aýdany aýmaǵyndaǵy «Batys Qytaı – Batys Evropa» halyqaralyq jol dálizinde, «Mashat» asýynda turǵan júk kólikteri men avtobýstaǵy jolaýshylarǵa Jibek joly, Qarabulaq, Arys aýyldyq okrýginiń turǵyndary, meshit ımamdary, depýtattar, kásipkerler men belsendi azamattardyń uıytqy bolýymen ystyq tamaqtar men ystyq sýsyndar, tipti jatyn oryndar uıymdastyryldy. Aýdandaǵy eriktiler jolda qalǵan árbir kólikke as jetkizip berýde.

«Túrkistan oblysynyń Tótenshe jaǵdaılar departamenti qolaısyz aýa-raıynda alys joldarǵa shyqpaýdy eskertedi. Joldardyń jaı-kúıi týraly «Dármen» mobıldi qosymshasynan bilýge bolady. Qar qursaýynda jolda qalyp qoıǵan azamattar 8-725-33-5-78-97, 102 jedel jelilerine habarlasa alady» - delingen Túrkistan oblysy ákimdigi taratqan aqparatta.