Túrkistan oblysynda jol-kólik oqıǵalary 68%-ǵa kóbeıgen

TÚRKІSTAN. KAZINFORM — Túrkistan oblysy aýmaǵynda jyl basynan beri tirkelgen jol-kólik oqıǵalary 68 paıyzǵa ósken. Al, jol-kólik oqıǵalarynan qaza bolǵandardyń kórsetkishi 16%-ǵa tómendep otyr. 

Túrkistan oblysy ákimdigi janyndaǵy quqyq buzýshylyq profılaktıkasy jónindegi vedomstvoaralyq komıssııasynyń otyrysynda jol-kólik oqıǵalarynyń jaı-kúıi talqylandy.

Jol apattary Arys, Báıdibek, Maqtaaral, Jetisaı, Otyrar aýdandarynda ósken.

Oblys ákimi Darhan Satybaldy qylmysty tómendetý boıynsha tıisti memlekettik organdarmen birlese naqty sharalar qabyldaýdy, osy baǵytta jumysty jalǵastyryp, qoǵamdyq qaýipsizdikti qatań baqylaýda ustaýdy tapsyrdy.

QR Bas prokýratýrasynyń quqyqtyq statıstıka jáne arnaıy esepke alý komıtetiniń Túrkistan oblysy boıynsha departament bastyǵynyń mindetin atqarýshy Muhtar Músirovtiń aıtýynsha óńirde qylmys sany 7%-ǵa azaıǵan.

Al, aýyr qylmystar 15,3%-ǵa tómendese, asa aýyr qylmystar 9,6%-ǵa ósken.

Urlyq 38,4% -ǵa kemigen, tonaý — 26,1%, mal urlyǵy — 46,1%, buzaqylyq — 25,7%, ınternet alaıaqtyq — 5,3%-ǵa azaıǵan.

Májiliste kedendik baqylaý salasyndaǵy atqarylyp jatqan jumystar, turmystyq zorlyq-zombylyqtyń aldyn alý profılaktıkasy jáne basqa da mańyzdy máseleler qaraldy. 

Jıyn barysynda berilgen tapsyrmalar, aıtylǵan kemshilikter men syn-eskertpeler hattamaǵa engizilip, nátıjeli jumystardy atqarý mindeti júkteldi.