Túrkistan oblysynda jol boıyndaǵy servıstiń taǵy 5 nysany salynady
ASTANA. KAZINFORM – Qazaqstanda zamanaýı kólik jáne jol boıyndaǵy ınfraqurylymdy damytý boıynsha júıeli jumystar júrip jatyr, dep habarlaıdy QR Kólik mınıstrliginiń baspasóz qyzmeti.
Memleket basshysynyń kólik jelisin jańǵyrtý jáne eldiń tranzıttik áleýetin nyǵaıtý týraly tapsyrmalaryn oryndaý sheńberinde Qazaqstan Respýblıkasy Kólik mınıstrligi «QazAvtoJol» UK» AQ jáne jergilikti atqarýshy organdarmen birlesip jol boıyndaǵy servıs obektilerin salý men jańǵyrtý boıynsha aýqymdy jobalardy iske asyryp keledi.
Bul jumysqa tranzıttik áleýeti joǵary óńirlerge erekshe nazar aýdarylyp otyr. Olardyń qatarynda Túrkistan oblysy da bar.
Búgingi tańda Túrkistan oblysynda jol boıyndaǵy servıstiń 105 obektisi jumys isteıdi, onyń 86-sy Ulttyq standart talaptaryna sáıkes keledi. Tutastaı alǵanda, Qazaqstan boıynsha 1428 obekt jumys istep tur, bul rette olardyń 93%-y belgilengen sapa pen qaýipsizdik standarttaryna saı keledi.
Halyqaralyq kólik dálizderin damytýda Qazaqstandy kórshiles memlekettermen baılanystyratyn kólik júıesiniń mańyzdy býyny bolyp tabylatyn Shymkent qalasynyń aınalma joly erekshe mańyzǵa ıe. Bul baǵyt kólik aǵyndaryn tıimdi bólýge jáne tranzıttik tasymaldardy arttyrýǵa yqpal etedi.
Jańa zamanaýı nysandardyń biri – Shymkent qalasynyń aınalma joly boıynda ornalasqan kópfýnktsıonaldy jol boıy servıs kesheni. Nysan bıylǵy jyldyń mamyr aıynda paıdalanýǵa berildi. Jobanyń ınvestory – «PetroRetail» JShS.
Keshen jolaýshylarǵa qyzmetterdiń keń aýqymyn usynady. Munda jeńil jáne júk kólikterine arnalǵan turaq aımaqtary, saýda alańdary, qoǵamdyq tamaqtaný pýnktteri, abattandyrylǵan sanıtarlyq-gıgıenalyq toraptar, ana men bala bólmesi, namazhana, sondaı-aq jolaýshylardyń jaılylyǵy men qaýipsizdigin qamtamasyz etetin basqa da servıster qarastyrylǵan.
Túrkistan oblysynda jol boıyndaǵy ınfraqurylymdy damytý jalǵasyp otyr. Bıyl jyl sońyna deıin jeke ınvestıtsııalar esebinen jol boıyndaǵy servıstiń taǵy 5 nysanyn salý josparlanyp otyr. Tutastaı alǵanda, el boıynsha 37 jańa nysan paıdalanýǵa berilmek.
Kólik mınıstrligi júrgizýshiler men jolaýshylardyń qaýipsizdigi men jaılylyǵyn arttyrýǵa yqpal etetin jol boıyndaǵy zamanaýı servıs obektilerin qurý boıynsha keshendi sharalar qabyldaýdy jalǵastyrýda. Bul ınfraqurylymdy damytý shaǵyn jáne orta bıznes úshin de jańa múmkindikter týǵyzady, ekonomıkalyq belsendilikti yntalandyrady jáne Qazaqstan óńirleriniń týrıstik tartymdylyǵynyń arttyrýǵa yqpal etedi.
Osyǵan deıin Abaı oblysynda jol qaýipsizdigin arttyratyn 13 lazerlik keshen ornatylǵany týraly jazdyq.
