Túrkistan oblysynda jol apatynan zardap shekkenderder jansaqtaý bóliminde jatyr

TÚRKІSTAN. KAZINFORM – Dene jaraqatyn alǵan tórt naýqas ta kámelet jasyna tolmaǵan. 

Túrkistan oblysynda jol apatynan zardap shekken 4 adam Kentaý qalalyq ortalyq aýrýhanasynda em qabyldap jatyr. Olardyń úsheýi jansaqtaý bóliminde jatqazylǵan. Al, bireýi synyq-syrqat bóliminde em qabyldap jatyr.

— Ortalyq aýrýhananyń qabyldaý bólimine jedel járdem brıgadasymen tórt naýqasty alyp keldi. Úsheýiniń jalpy jaǵdaıy aýyr, jansaqtaý bóliminde jatyr. Bir naýqas travmatologııa bólimine jatqyzyldy. Medıtsınalyq kómek der kezinde kórsetildi, emdep jatyrmyz. Іshinde bir naýqastyń jaǵdaıy tipti aýyr. Dárigerler qoldan kelgen em-domnyń barlyǵyn jasap jatyr, - dedi Kentaý qalalyq ortalyq aýrýhanasynyń bas dárigeri Asylbek Ýtebaev.

Aıta keteıik, keshe Kentaýdaǵy jol apatynan 6 adam qaıtys boldy. Eki kóliktiń qatysýymen bolǵan jol apaty boıynsha tártip saqshylary tergeý júrgizip jatyr.