Túrkistan oblysynda joǵary qysymdy gaz qubyry jarylyp, 2 aýyl gazsyz qaldy

TÚRKІSTAN. KAZINFORM – Polıtsııa oqıǵaǵa kinálilerdi izdestirip jatyr. 

Saýran aýdanyna qarasty Ibata men Oıyq aýyldaryndaǵy 500-ge jýyq turǵyn gazsyz qaldy. Oqıǵaǵa belgisiz tehnıkanyń joǵary qysymdy gaz qubyryna soqtyǵysýy sebep bolǵan. Qaýipsizdik erejeleriniń óreskel buzylýy saldarynan «polıetılen–bolat» ótkeli búlinip, aýmaqqa tabıǵı gaz tarap ketken. Apatqa kináli adam oqıǵa ornynan ketip qalǵan, ári jedel qyzmetterge habar bermegen.

— Jergilikti turǵyndardyń qaýipsizdigine úlken qater tóndi. Osyǵan baılanysty Túrkistan qalalyq polıtsııa departamentiniń qyzmetkerleri dereý shaqyrtylyp, kinálini izdestirý jumystary júrgizilip jatyr. Jergilikti gaz qyzmetkerleri 300 mm klapandardy der kezinde jaýyp, gazdyń taralýyn toqtatyp, apattyń aldyn aldy. Gaz qubyrynyń 50 metr aýmaǵyn tekserildi. Qosymsha zaqym nemese aqaýlar anyqtalǵan joq, - delingen «QazaqGaz Aimaq» AQ-nyń qoǵammen baılanys jáne ıntegratsııalanǵan menedjment júıeleri jónindegi departamenti taratqan aqparatta.

Qazirgi ýaqytta «QazaqGaz Aimaq» mamandary gazben jabdyqtaýdy qalpyna keltirý jumystaryn júrgizip jatyr.

— Gaz taratý jelileriniń mańynda jumys júrgizetin barlyq qurylys kompanııalaryn jáne kólik júrgizýshilerin qaýipsizdik talaptaryn qatań saqtaýǵa shaqyramyz. Jaýapkershilikten jaltarý jazadan qutqarmaıdy — kináliler zań aıasynda anyqtalyp, jaýapqa tartylady, - delingen aqparatta.

Aıta keteıik, budan buryn Túrkistan oblysynyń qaı aımaǵynda ekologııalyq jaǵdaı nashar ekenin jazǵan bolatynbyz.