Túrkistan oblysynda jyrtyq týdyń jelbirep turǵan vıdeosy tarady

TÚRKІSTAN. KAZINFORM- Áleýmettik jelide jyrtylyp qalǵan Memlekettik Týdyń jelbirep turǵan vıdeosy tarady. Jazba avtorlarynyń aıtýynsha, oqıǵa Keles aýdanynda bolǵan.

Jelide jarııalanǵan vıdeoǵa pikir jazýshylardyń basym bóligi jergilikti ákimdikti kinálap jatyr. Olardyń arasynda «Ákimdikke aıyppul salý kerek», «Kúlemiz ba, jylaımyz ba? «Osyǵan mán bermegen ákimdi ornynan alyp tastaý kerek», «Alaqandaı aýdannyń kók týyn kórmegeni, murnynyń astyn kórmegeni», «Keles aýdany atqarý bıligi qaıda qarap otyr», «Ákimderin aýystyrý kerek, jumys istemegeni kórinip tur», «Uıat bolypty», «Patrıotızm kaıda?», «Aıı, bir kem dúnıe bopty ǵoı» degen jazbalar bar.

Al, jergilikti ákimdiktiń baspasóz qyzmeti oqıǵanyń 6 qarasha kúni bolǵanyn jetkizdi. Sondaı-aq, jyrtylǵan týdyń der kezinde aýystyrylǵandyǵyn málimdedi.

«Sol kúni kún bqzylyp, nóser jańbyr jaýdy, qatty jel turdy. Nátıjesinde aýdan ortalyǵy Abaı aýylyndaǵy tuǵyr ústindegi Memlekettik Týǵa zııan kelgen bolatyn. Oryn alǵan jaıt boıynsha jaýapty mekemeler shuǵyl túrde Memlekettik Týdy qalpyna keltirdi» - delingen ákimdik jaýabynda.

Aıta keteıik, aýdan ortalyǵyndaǵy 30 metrlik týtuǵyr 2019 jyly ashylǵan bolatyn. Ondaǵy Týdyń eni 3 metr, al uzyndyǵy 6 metrdi quraıdy.

Jaqynda ǵana Almaty oblysy Talǵar aýdanyndaǵy qoqys polıgonynan birneshe Eltańba men Memlekettik tý tabylǵany jáne ol týraly beınejazbanyń áleýmettik jelilerge taraǵany týraly jazdyq.