Túrkistan oblysynda jylý berý maýsymy qashan bastalady
TÚRKІSTAN. KAZINFORM – Bıyl Túrkistan oblysynda jylý berý maýsymy 15 qazan men 1 qarasha aralyǵynda bastalady dep josparlanyp otyr. Qazir óńirde oǵan daıyndyq jumystary júrgizilip jatyr.
2026-2027 jyldardaǵy jylytý maýsymyna óńirdegi 1265 bilim berý, 737 densaýlyq saqtaý, 239 mádenıet, 74 sport, 9 jumyspen qamtý nysany jáne 737 kópqabatty turǵyn úı daıyndalǵan.
– Jylytý maýsymyna oblys boıynsha 532,5 myń tonna kómir qajet. Onyń 291,7 myń tonnasy nemese 55 paıyzy qamtamasyz etildi. Sonymen qatar 26 kásipkerlik nysannyń qoımalarynda shamamen 67,5 myń tonna kómir qory bar. Al bıýdjettik mekemelerge qajetti 3,1 myń tonna dızel otyny tolyq jetkizildi, – dedi oblystyq energetıka jáne turǵyn úı-kommýnaldyq sharýashylyq basqarmasynyń bólim basshysy Marat Baıgýnýsov.
Sondaı-aq jylý energetıka keshenderin qajetti otynmen qamtamasyz etý úshin oblysqa 8 myń tonna mazýt qajet. Bul rette «Kentaý Jylý» JShS jáne «Sholaqqorǵan sý» MKK-men mazýt jetkizý boıynsha kelisimsharttar jasalǵan. Bekitilgen kestege sáıkes mazýt jetkiziledi.
Marat Baıgýnýsovtyń aıtýynsha, jylý maýsymy syrtqy aýanyń ortasha temperatýrasy bes táýlik boıy +8°C-tan tómen bolǵan jaǵdaıda bastalady.
– Osyǵan baılanysty oblysta jylytý maýsymy 15 qazan men 1 qarasha aralyǵynda bastalady dep josparlanyp otyr. Óńirdegi daıyndyq jumystary oblystyq shtabtyń turaqty baqylaýynda, – dedi ol.
Aıta keteıik, oblys boıynsha jylýmen qamtamasyz etý júıesinde bir jylý energetıka kesheni, 34 ortalyqtandyrylǵan jáne 2210 avtonomdy bıýdjettik mekeme qazandyǵy jumys isteıdi.
Buǵan deıin Semeıdegi jylý maýsymyna daıyndyqtyń ne sebepti keshikkenin habarlaǵan edik.
