Túrkistan oblysynda jylyna 150 myń tonna júgerini tereń óńdeıtin zaýyt iske qosyldy
ASTANA. KAZINFORM - Túrkistan oblysynyń Shardara aýdanynda «Qazkrahmal» JShS júgerini tereń óńdeý zaýyty jumysyn bastady. Jańa kásiporynnyń óndiristik qýaty jylyna 150 myń tonna shıkizat óndirýge qaýqarly. Kásiporyn iske qosylsa 500 adam jumyspen qamtylady.
QR Aýyl sharýashylyǵy mınıstrligi baspasóz qyzmetiniń habarlaýynsha, zaýyt is júzinde qaldyqsyz óndiristi qamtamasyz etetin zamanaýı quraldarmen jabdyqtalǵan: júgerini óńdeý tereńdigi 98%-ǵa jetedi.
Birinshi kezeńde kásiporyn modıfıkatsııalanǵan krahmal, glıýten, syǵyndy, tsellıýloza jáne basqa da ónim túrlerin shyǵarady. Tolyq qýatqa shyqqan kezde assortıment 28 ataýǵa deıin keńeıedi, onyń ishinde tereńirek qaıta óńdelgen ónimder – maltodekstrın, melassa, sıroptar jáne onymen baılanysty salalarda suranysqa ıe basqa da ónimder shyǵady.
Kásiporyndy shıkizatpen qamtamasyz etý úshin Túrkistan oblysynda júgeri egis alqaptary kezeń-kezeńimen ulǵaıtylyp, tamshylatyp sýarý júıeleri engizilip jatyr. Bul ásirese sý resýrstary shekteýli aımaqqa qatysty. Sonymen qatar júgeri kúrishpen salystyrǵanda sýdy az qajet etetin daqyl.
Premer-mınıstrdiń orynbasary – ulttyq ekonomıka mınıstri Serik Jumanǵarın atap ótkendeı, Qazaqstan – astyqtyń dástúrli iri óndirýshisi jáne eksporttaýshysy. Sońǵy úsh jylda dándi daqyldyń jyldyq ónimi 24 mln tonnadan asady. Mundaı kólem ishki qajettilikti qamtamasyz etýge jáne eksporttyq pozıtsııalardy saqtaýǵa ǵana emes, sonymen qatar el ishinde astyq óńdeýdi arttyrýǵa múmkindik beredi.
-Bizdiń mindetimiz – astyqty shıkizat retinde eksporttaýmen shektelip qana qoımaı, qosylǵan quny joǵary ónim óndirýdi damytý. Búginde Qazaqstanda jalpy qýaty jylyna 510 myń tonna astyqty tereń óńdeıtin úsh kásiporyn jumys isteıdi. Bıyl Jambyl oblysynda qýaty jylyna 500 myń tonna júgerini óńdeıtin Fufeng Group kesheniniń birinshi kezegi iske qosyldy. Budan basqa, tórt iri ınvestıtsııalyq joba pysyqtalý ústinde jáne iske asyrylyp jatyr – ekeýi Aqmola oblysynda jáne biri Qostanaıda, taǵy bireýi Astanada. Jańa óndiristik qýattar el ishinde astyq shıkizatyn jylyna 5,8 mln tonnaǵa deıin tereń óńdeýdi qamtamasyz etedi. Bul qosylǵan quny joǵary ónim shyǵarýdy keńeıtýge jáne qaıta óńdelgen aýyl sharýashylyǵy óniminiń eksportyn ulǵaıtýǵa múmkindik beredi», — dep atap ótti Serik Jumanǵarın.
Osyǵan deıin Qyzylorda oblysynda 40 mlrd teńgelik júgeri óńdeý jobasynyń alǵashqy kezeńi iske qosylǵany týraly jazdyq.