Túrkistan oblysynda jyl basynan beri memleketke qansha jer qaıtaryldy
TÚRKІSTAN. KAZINFORM – Túrkistan oblysynda bıyl maqsatyna saı paıdalanylmaǵan 47,6 myń gektar jer ýchaskesi memleket menshigine qaıtaryldy.
Oblystyq jer qatynastary basqarmasynyń basshysy Erǵalı Tilegenniń aıtýynsha, óńirdiń jalpy jer qory 11 mln 610,3 myń gektar. Bıyl maqsatyna saı paıdalanylmaǵan 40 myń gektar jerdi memleket menshigine qaıtarý josparlanǵan bolsa, búgingi kúnge deıin bul kórsetkish 47,6 myń gektarǵa jetken.
Onyń aıtýynsha, qazirgi tańda oblys boıynsha 87 myńnan astam jeke jáne zańdy tulǵanyń ıeliginde jalpy kólemi 4 mln 527,3 myń gektar aýyl sharýashylyǵy maqsatyndaǵy jer ýchaskeleri tirkelgen. Jer paıdalanýshylarǵa jerdi nysanaly maqsatyna saı paıdalaný qajettigi jóninde habarlamalar berilgen.
– Jyl basynda eldimekenderde 531,1 myń gektar qoǵamdyq jaıylym tapshylyǵy anyqtaldy. Bıyl bul máseleni sheshý maqsatynda memleket menshigine qaıtarylǵan jaıylymdardyń 161,9 myń gektaryn aýyldyq okrýg ákimdikterine qoǵamdyq jaıylym retinde bekitý josparlanǵan edi. Jyl basynan beri 165,6 myń gektar jaıylym jer qoǵamdyq jaıylym úshin bekitildi. Nátıjesinde qoǵamdyq jaıylym tapshylyǵy 365,5 myń gektarǵa deıin tómendedi, – dedi spıker.
Sondaı-aq jumys organy tarapynan búginge deıin 97 jer paıdalanýshyǵa tıesili 181 jer ýchaskesiniń qujattary qaralǵan.
Budan buryn Túrkistan oblysynda 530 myń gektardan astam qoǵamdyq jaıylym tapshy ekenin jazǵan edik.
