Túrkistan oblysynda jyl basynan beri 380 adam jol apatynan mert bolǵan
Túrkistan oblysynda jyl basynan beri jol-kólik oqıǵalarynan 380 adam mert bolǵan, dep habarlaıdy Kazinform.
Túrkistan oblysynda erekshe aktsııa bastaldy.
ıAǵnı, apatqa ushyrap, jaramsyz bolyp qalǵan kólikterdi tıegen evakýatorlar qala kóshelerin aralap, jol qaýipsizdiginiń saldaryn kórsetip jatyr.
Sondaı-aq, «Jyldamdyqty asyrmańyz, sizdi úıde otbasyńyz kútip otyr», «Qarama-qarsy baǵytqa shyqpańyz, bul sizdiń jáne ózgelerdiń ómirine qaýipti», «Oılanyńyz, mas bolyp kólik júrgizý asa qaýipti» dep kólikke jazylǵan sózder de birden kózge túsedi.
Polıtseıler daýys zoraıtqysh arqyly jol-kólik oqıǵasynyń aldyn alý baǵytynda eskertpe aıtyp júr.
«Túrkistan oblysy polıtsııa departamentiniń bastamasymen oblys ortalyǵynda asa mańyzdy aktsııa uıymdastyrylyp otyr. Osy arqyly turǵyndarǵa oı salyp, jol apatynyń saldary óte aýyr ekenin eldiń sanasyna jetkizýge tyrysyp jatyrmyz. Túrkistan qalasynan bastaý alǵan aktsııa bir apta jalǵasady. Oblystaǵy 17 qala-aýdanda da ótkizilip, túsindirme jumysyn júrgizemiz», - deıdi Túrkistan oblysy polıtsııa departamentiniń baspasóz hatshysy Gúlnár Ábdijapparova.
