Túrkistan oblysynda jyl basynan beri 29 bala sýǵa ketip kóz jumdy
TÚRKІSTAN. KAZINFORM — Túrkistan oblysynda sýda qaza bolǵan balalar sany artqan.
Oblystyq tótenshe jaǵdaılar departamentiniń bólim ınjeneri Fýrhat Joldasovtyń aıtýynsha, sýǵa ketý oqıǵalarynyń basym bóligi arnaıy jabdyqtalmaǵan jáne shomylýǵa tyıym salynǵan oryndarda tirkeledi.
— 2026 jylǵy 1 qyrkúıektegi jaǵdaı boıynsha oblysta sýdaǵy qaıǵyly oqıǵalardan 52 adam qaza tapty, onyń 29-y — bala. Ótken jyldyń osy kezeńinde óńirde 55 adam, onyń ishinde 25 bala kóz jumǵan, — dedi ol baspasóz máslıhatynda.
Jalpy óńirde sýdaǵy jazataıym oqıǵalar azaıǵanymen, balalardyń sýda qaza bolý kórsetkishi 16 paıyzǵa ósken.
Spıkerdiń málimdeýinshe, bıyl sońǵy úsh jyldaǵy sýǵa ketý oqıǵalaryna taldaý júrgizilip, qaýipti ýchaskelerde kúndelikti patrýl uıymdastyrylǵan. Jumystar Keles, Saryaǵash, Maqtaaral, Jetisaı, Shardara jáne basqa da aýdandarda júrgizildi.
— Jyl basynan beri 1549 reıdtik-patrýldik is-shara ótkizilip, sýdaǵy qaýipsizdik talaptaryn buzǵan 177 azamat ákimshilik jaýapkershilikke tartyldy. Olarǵa jalpy 2 mln 724 myńnan astam teńge aıyppul salyndy. Byltyr osy kezeńde 151 azamatqa ákimshilik shara qoldanylǵan, — dedi Fýrhat Joldasov.
Buǵan deıin Túrkistan oblysynda birneshe aı buryn Keles ózenine sýǵa ketken 8 jasar balany izdeý jumystary qaıta jalǵasqanyn habarlaǵan edik.
