Túrkistan oblysynda jyl basynan beri 14 adam sýǵa ketken, onyń 10-y balalar

TÚRKІSTAN. KAZINFORM - Óńirdegi sý nysandary men shomylý oryndarynda qaýipsizdik sharalary kúsheıtiledi. Atalǵan másele búgin oblys ákimi Darhan Satybaldynyń qatysýymen ótken májiliste talqylandy.

Tótenshe jaǵdaılar qyzmetiniń ókilderi jergilikti polıtsııamen, kólik ınspektsııasymen jáne balyq sharýashylyǵy ınspektsııalarymen birlesip, sýdaǵy qaýipsizdik boıynsha halyqqa túsindirý jumystaryn únemi júrgizip keledi. Sondaı-aq, bilim berý uıymdarynda oqýshylarǵa ınteraktıvti sabaq ta ótkizgen.

Degenmen, óńirde jyl basynan beri 14 adam sýǵa ketken, onyń 10-y balalar. Onyń ishinde 2-8 jas aralyǵyndaǵy 8 jetkinshek bar.

Májiliste oblys ákimi jaýapty mekemeler men aýdan, qala ákimderine turǵyndardyń, ásirese, balalardyń qaýipsizdigin saqtaý baǵytyndaǵy jumystardy jandandyrý jóninde tapsyrma berdi.

«Shomylý maýsymy ashylyp jatyr. Tótenshe jaǵdaı departamenti, aýdan, qala ákimdikterindegi jaýapty bólimder qyraǵylyqty kúsheıtýi tıis. Turǵyndar arasynda sýǵa shomylý erejelerin saqtaý, qaýipti aımaqtarǵa shomylmaý jóninde túsindirý jáne aqparattyq jumystar júrgizilsin. Barlyq aýdan, qaladaǵy jurtshylyq shomylatyn oryndardyń kartasyn ázirlep, sol aımaqtarda qaýipsizdikti kúsheıtý kerek. Sý nysandaryn qorshaý, balalarǵa arnalǵan karkasty basseındermen, kommýnaldy shomylý jaǵajaılarymen qamtý jumystary jandansyn», – dedi Darhan Satybaldy.

Búginde Túrkistan oblysynda jalpy 4334 sý nysany bar. Olardyń 42-si sý qoımasy bolsa, 149 iri jáne kishi ózender. Al, 25-i kól, 2870-i kanal jáne 1248-i qashyrtqy.

Búginde sýǵa shomylý úshin daıyndalǵan 27 oryn bar.