Túrkistan oblysynda jyl basynan beri 139 órt oqıǵasy tirkeldi
TÚRKІSTAN. KAZINFORM — Oblysta órt qaýipsizdigi talaptaryn buzǵan 116 tulǵaǵa 7 mln teńgeden astam aıyppul salyndy.
Túrkistan oblystyq Tótenshe jaǵdaılar departamenti bastyǵynyń birinshi orynbasary Asqar Seısenovtyń aıtýynsha, bıyl jazda óńirde aýa raıy ádettegiden ystyq bolady dep boljanyp otyr.
— Qazgıdromet málimetine sáıkes, maýsym men qazan aılary aralyǵynda oblystyń basym bóliginde aýa temperatýrasy klımattyq normadan 1-2 gradýsqa joǵary bolady. Al shilde men tamyz aılarynda aýa temperatýrasy turaqty túrde +40 gradýstan joǵary saqtalady degen boljam bar. Bul órt pen janý oqıǵalarynyń qaýpin arttyrady, — dedi ol baspasóz máslıhatynda.
Spıkerdiń sózinshe, departament teńgeriminde jalpy 244 tehnıka bar. Orman jáne dala órtterin sóndirýge 340 maman men 70 tehnıka ázirlengen. Sondaı-aq 1 tikushaq pen 6 ushqyshsyz ushý apparaty paıdalanýǵa ázir.
— Quramnyń ázirligin tekserý maqsatynda 28-29 mamyr kúnderi Báıdibek aýdanynda respýblıkalyq «Órt-2026» komandalyq-shtabtyq oqý-jattyǵýy ótkizildi. Jalpy jyl basynan beri oblys aýmaǵynda 139 órt oqıǵasy tirkeldi. Ótken jyldyń osy kezeńinde bul kórsetkish 186 bolǵan. Orman qorynda 1 órt, al dalalyq alqaptarda 2 órt deregi anyqtaldy, — dedi Asqar Seısenov.
Departamenttiń memlekettik órt baqylaý basqarmasynyń bastyǵy Meıramhan Kemelhanov dala órtteriniń aldyn alý jáne olardy sóndirý jumystaryna qajetti qarjy bólingenin aıtty.
— Bul maqsatta qalalyq jáne aýdandyq ákimdikter tarapynan jalpy 83,7 mln teńge bólindi. Oblystaǵy 478 eldimekenniń aınalasy mıneraldy jolaqtarmen qorshalyp, qurǵaq shópterden tazartyldy. Jalpy uzyndyǵy 9602 shaqyrymnan asatyn mıneraldy jolaq júrgizildi. Órt qaýipti kezeńde baqylaýdy kúsheıtý úshin 14 mobıldi top quryldy. Reıdtik is-sharalar nátıjesinde 116 tulǵa ákimshilik jaýapkershilikke tartylyp, 7 mln 266 myń teńge kóleminde aıyppul salyndy. Sondaı-aq avıatsııalyq tehnıka arqyly sý alý úshin 10 arnaıy sý aıdyny belgilendi, — dedi spıker.
Aıta keteıik, óńirde departamentke qarasty 42 órt sóndirý bólimshesi jumys isteıdi. Sonymen qatar sońǵy eki jylda eldimekenderdiń qaýipsizdigin arttyrý maqsatynda 10 aýyldyq órt sóndirý pýnkti ashylǵan. Onda 62 qyzmetker eńbek etip, 10 órt sóndirý avtokóligi kezekshilik atqarady.
Budan buryn Túrkistandaǵy ortalyq bazarda órt qaýipsizdigi talaptary saqtalmaı otyrǵanyn jazǵan edik.
