Túrkistan oblysynda jerdi zańsyz paıdalanyp, paıdaly qazba óndirgender anyqtaldy
ASTANA. KAZINFORM – Túrkistan oblysynyń mamandandyrylǵan tabıǵat qorǵaý prokýratýrasy jer qoınaýyn zańsyz paıdalaný jaǵdaılaryn boldyrmaý jáne aldyn alý maqsatynda reıdtik is-shara uıymdastyrdy.
Oblystyq prokýratýra málimetinshe, arnaıy «Dron» qurylǵysynyń kómegimen Saýran aýdany aýmaǵyndaǵy «Qursaı» ózeni boıynda jer qoınaýynyń tutastyǵyn buza otyryp, keń taralǵan paıdaly qazbalardyń (qum-qıyrshyqtas qospasy) zańsyz óndirilgeni anyqtaldy.
Jer qoınaýyn zańsyz paıdalaný – halyq narazylyǵyn týdyratyn jáne qoǵamdyq-saıası turaqtylyq pen qorshaǵan ortaǵa teris áser etetin faktorlardyń biri.
Prokýrorlyq qadaǵalaý aktileriniń negizinde zańsyz jasalǵan memorandým buzylyp, tártiptik teris qylyqqa jol bergen Shaǵa aýyldyq okrýginiń ákimi qyzmetinen bosatýǵa usynyldy. Aýdan ákiminiń orynbasary men polıtsııa qyzmetkerleri tártiptik jaýapkershilikke tartyldy.
Aıta keteıik, paıdaly qazbalardy tájirıbelik-ónerkásiptik maqsatta alý syltaýymen jasyryn óndirý derekterine jaýapkershilik engizilip jatyr. Bul týraly QR Ónerkásip jáne qurylys vıtse-mınıstri Iran Sharhan málim etti.