Túrkistan oblysynda jer qoınaýyn zańsyz paıdalanǵandar 558 mln teńgeden astam shyǵyn keltirdi
TÚRKІSTAN. KAZINFORM – Túrkistan oblysynda 221 jer qoınaýyn paıdalanýshynyń tek 98-i ǵana resmı rásimdelgen.
Túrkistan oblysynda keń taralǵan paıdaly qazbalardy óndiretin 221 jer qoınaýyn paıdalanýshy tirkelgen. Olar 75 kelisimshart jáne 146 lıtsenzııa negizinde jumys isteıdi.
Oblystyq ónerkásip jáne ındýstrıaldy-ınnovatsııalyq damý basqarmasynyń basshysy Nurlybek Isaevtyń aıtýynsha, 2025 jyly 35 jer qoınaýyn paıdalanýshynyń 123 myń gektar jeri, al 2026 jyldyń basynan beri 3 paıdalanýshynyń 501 myń gektar jeri memleketke qaıtarylǵan.
– Oblysta jumys isteıtin 221 jer qoınaýyn paıdalanýshynyń jer telimderine taldaý júrgizilip, olardyń 98-i rásimdelgeni, al 123 jer telimi rásimdelmegeni anyqtaldy, – dedi ol.
Vedomstvo málimetinshe, óńirde jer qoınaýyn zańsyz paıdalaný faktileri boıynsha baqylaý kúsheıtilgen. Bul oraıda aýdan, qala ákimdikteri tarapynan 28 jer qoınaýyn paıdalanýshynyń jer telimderiniń nysanaly maqsatyn aýystyrý týraly qaýly qabyldanǵan.
Sondaı-aq qujattaryn rásimdemeı jumys júrgizgen 95 paıdalanýshyǵa akt toltyrylyp, ýákiletti organǵa joldandy. Ótken jyly 226 reıd júrgizilip, 342 júk kóligi men 47 arnaıy tehnıka aıypturaqqa qoıylsa, 74 ákimshilik is boıynsha 16,8 mln teńge zalal eseptelgen.
– Bıyl 40 reıd ótkizilip, 60 tehnıka toqtatylyp, 5,1 mln teńge zalal anyqtaldy. Óńirde zańsyz qazba jumystary júrgizilip jatqan 22 «qyzyl núkte» belgili boldy. Onyń 15-i – jeke menshik, 7-i – jaıylym jer. Atalǵan jer telimderin memleket menshigine qaıtarý boıynsha jumystar bastaldy. Sondaı-aq zańsyz áreketterden kelgen 558,4 mln teńge zalal eseptelip, materıaldar quqyq qorǵaý organdaryna joldandy, – dedi Nurlybek Isaev.
Túrkistan oblysy Polıtsııa departamenti bastyǵynyń birinshi orynbasary Arman Tilenshınniń málimdeýinshe, oblysta zańsyz jer qoınaýyn ıgerýge qatysty bıyl 51 quqyq buzýshylyq bolǵan.
– Anyqtalǵan derekter boıynsha materıaldar ýákiletti organǵa joldandy, 40 is boıynsha 5,1 mln teńge ekonomıkalyq zalal eseptelip, Ekologııa departamentine jiberildi. 29 is boıynsha 1,9 mln teńge aıyppul salyndy, – dedi ol.
Onyń sózinshe, jyl basynan beri reıdter barysynda óńirde 64 júk kóligi men 6 arnaıy tehnıka aıypturaqqa qoıylǵan.
– Sonymen qatar jol qozǵalysy talaptaryn buzǵany úshin 2190 ákimshilik quqyq buzýshylyq anyqtalyp, 17,6 mln teńge aıyppul salyndy, – dedi ol.
Jalpy byltyr jer qoınaýyn paıdalanýshylardan oblystyq bıýdjetke 9,1 mlrd teńge qarjy túsken. Lıtsenzııalary toqtatylǵan jáne ıgerilmegen jer ýchaskelerine ınventarızatsııa júrgizip, memleket menshigine qaıtarý úshin arnaıy komıssııa qurylǵan.
Túrkistan oblysynyń ákimi Nuralhan Kósherov jaýaptylarǵa tabıǵı qazbalardy zańsyz paıdalanýshylarǵa qarsy kúresti kúsheıtýdi, ekologııalyq apattardyń aldyn alý jumysyn jandandyrýdy tapsyrdy.
– Jer qoınaýy men paıdaly qazbalardy zańsyz qoldanýshylarǵa qarsy mobıldi toptardyń jumysyn jandandyrý kerek. Óńirdegi ózen-kólder men karerler turaqty baqylanýy tıis. Barlyǵy zańǵa sáıkes bolýy qajet, – dedi aımaq basshysy.
Budan buryn habarlaǵanymyzdaı, Túrkistan oblysynda polıtseıler qumdy zańsyz óndirýmen aınalysqan topty anyqtady. Olar memleketke 437 mln teńge kóleminde shyǵyn keltirgen.
