Túrkistan oblysynda jer kezegine turǵandar sany 500 myńnan asqan
TÚRKІSTAN. KAZINFORM – Sońǵy jyldary oblysta jeke úı salý úshin tegin jer telimin alýǵa suranys kúrt ósken.
Qazirgi tańda óńirde 10 sotyq jer alýǵa nıetti azamattardyń sany úsh ese artyp, 508 451 adamǵa jetken. Al 2022 jylǵy 1 naýryzǵa deıin kezekte 140 myń adam bolǵan.
Elektrondy esep júıesiniń engizilýi azamattarǵa turaqty tirkelgen jerine qaramastan, kez kelgen óńirge ótinish berýge múmkindik berdi.
– 2022 jyldyń birinshi toqsanynan bastap Aýyl sharýashylyǵy mınıstrliginiń jer kezegin esepke alatyn elektrondy aqparattyq júıesi iske qosyldy. Bul júıe arqyly azamattar tirkelgen jerine qaramaı, birneshe óńirde qatar kezekke tura alady, – dedi oblystyq jer qatynastary basqarmasy bóliminiń bas mamany Manatbek Eshmat.
Nátıjesinde bir jyl ishinde oblysta jeke turǵyn úı qurylysyna jer alýǵa ótinish berýshiler sany úsh ese ósip, 500 myń adamnan asqan.
Kóptegen ótinishke qaramastan, memleket endi ınjenerlik jelilersiz jer telimderin bermeıdi. Ulttyq ekonomıka mınıstriniń talabyna sáıkes, qurylysqa arnalǵan jer tek ınfraqurylymy daıyn aýmaqtardan ǵana bólinedi. Sondyqtan óńirde 10 sotyq jer úlestirýdiń negizgi kedergisi – ınfraqurylym máselesi.
Injenerlik jelilerdi tartý qomaqty qarjy men uzaq ýaqytty talap etedi.
– Jeke turǵyn úı qurylysyna jer telimderi tek sý jáne elektr jelileri tartylǵan alańdarda ǵana beriledi. Azamattardyń ótinishteri arnaıy esepke alynyp, daıyn alańdar bolǵanda nemese bos jerler paıda bolǵan jaǵdaıda kezek tártibimen qamtamasyz etiledi, – deıdi oblystyq jer qatynastary basqarmasynyń basshysy Erǵalı Tilegen.
Resmı málimetke súıensek, 2025 jyly aýdan ákimdikteri 655 jer telimin ázirlep, azamattarǵa úlestirgen. Bul jer telimderi Báıdibek, Qazyǵurt, Ordabasy, Sozaq jáne Keles aýdandaryna tıesili.
– Qazirgi tańda aýdan ákimdikteri jer telimderin daıyndaý jáne olardy qajetti ınfraqurylymmen qamtamasyz etý jumystaryn júrgizip jatyr. Barlyq ınjenerlik jeliler tartylǵannan keıin, jer telimderi kezek boıynsha azamattarǵa beriledi, – dep habarlady oblystyq jer qatynastary basqarmasy.
Injenerlik ınfraqurylym daıyndalǵanǵa deıin azamattar óz kezegin kútip, onyń jyljýyn turaqty baqylap otyrýy qajet.
Kezekti eGov.kz portalyndaǵy «Jyljymaıtyn múlik» – «Jer qatynastary» bóliminde nemese jeke kabınettegi «Qyzmetterdi alý tarıhy» arqyly, sondaı-aq ashyq kadastrlyq karta geoportalyndaǵy «Kezekte turǵandar tizilimi» bóliminde JSN engizý arqyly tekserýge bolady.
Sonymen qatar, eGov.kz portalynda kezekke turý qyzmeti qoljetimdi. Azamattar kez kelgen óńirdi tańdap, ótinishti elektrondyq tsıfrlyq qoltańba arqyly rastaı alady.
Aıta keteıik, tegin jer telimin alý quqyǵy bir ret qana beriledi. ıAǵnı kezek qaı óńirde jyldamyraq jyljysa, jer telimi sol óńirden usynylady.
Budan buryn Túrkistan qalasynda 95 350 azamat jer telimin alý úshin kezekte turǵanyn jazǵan edik.
Sonymen qatar Shymkent qalasynda jer kezeginde turǵandar 283 myń adamǵa jetkeni habarlandy.
