Túrkistan oblysynda Jeńis kúnine oraı ardagerlerge 1,5 mln teńgeden beriledi

TÚRKІSTAN. KAZINFORM - Atalǵan tólemder 3 mamyrǵa deıin tolyq tólenedi. Bul týraly Túrkistan oblysy ákimdiginiń baspasóz qyzmeti málimdedi.

Jalpy 3654 ardager men tyl eńbekkerlerine Uly Jeńis merekesiniń qurmetine bir rettik materıaldyq kómek tóleý úshin aýdandyq, qalalyq bıýdjet esebinen 176,5 mln teńge qarjy bólindi. Atalǵan tólemder 3 mamyrǵa deıin tolyq tólenedi. Onyń ishinde 11 Ekinshi dúnıejúzilik soqys qatysýshylary men múgedekterine 1500,0 myń teńge, kámeletke tolmaǵan burynǵy tutqyndarǵa, Ekinshi dúnıejúzilik soǵysqa qatysýshylar men olarǵa teńestirilgen basqa da sanattarǵa 100 myń teńgeden, blokadalyq Lenıngradtyń turǵyndaryna 60 000 teńgeden, tyl eńbekkerlerine 30 000 teńgeden (3522 adam) beriledi.

Jeńis kúninde Túrkistan qalasyndaǵy «Máńgilik alaýǵa» gúl shoqtaryn qoıý josparlanyp otyr. Sonymen qatar patrıotızm men otansúıgishtik rýhty nyǵaıtý maqsatynda belgili tarıhı tulǵalardyń, batyrlardyń eskertkishine gúl shoqtaryn qoıý, volonter jastardyń kúshimen EDS qatysýshylarǵa kómek kórsetý, «Ardaǵym ardagerim» aktsııasy ótkiziledi dep kútilýde.

Aıta keteıik, Túrkistan oblysynan Ekinshi Dúnıejúzilik soǵysqa 140 myńnan astam azamat attanǵan. Onyń ishinde 51-i Keńes Odaǵynyń batyry jáne 8 - i III dárejeli «Dańq» ordeni kavalerleri ataǵyn alǵan.