Túrkistan oblysynda jekemenshik balabaqshanyń balalary jappaı ýlanyp qaldy
TÚRKІSTAN. KAZINFORM – Qazir tamaqtan ýlanǵan balalardyń sany 34-ke jetti. Atalǵan jaǵdaıǵa baılanysty Keles aýdandyq polıtsııa bólimi tarapynan qylmystyq is qozǵaldy.
Oqıǵa Keles aýdanynda boldy. 24 maýsym kúni tańǵy astan keıin, ıaǵnı saǵat 11:00 shamasynda balalar ózderin jaısyz sezine bastaǵan. Sodan bóbekjaı-balabaqsha qyzmetkerleri dáriger men meıirbıkeni shaqyryp, alǵashqy dárigerlik kómekter kórsetken. Qazir aýrýhanaǵa túsken balalardyń jaǵdaıyn dárigerler jiti baqylap otyr.
«Keles aýdanyndaǵy jekemenshik balabaqshada balalardyń ýlaný jaǵdaıy Túrkistan oblysy bilim basqarmasynyń nazaryna alyndy. Keles aýdandyq sanıtarııalyq-epıdemıologııalyq baqylaý basqarmasy tarapynan tekserý jumystary júrgizildi. Tańǵy asta balalarǵa berilgen botqanyń quramy, súttiń quramy saraptamaǵa jiberilgen. Aýrýhanaǵa jóneltilgen balalardyń jaǵdaıy dárigerlerdiń jiti baqylaýynda. Jaǵdaıǵa baılanysty Keles aýdandyq polıtsııa bólimi tarapynan qylmystyq is qozǵaldy», - delingen Túrkistan oblysy bilim basqarmasynyń baspasóz qyzmeti usynǵan aqparatta.
